Daimiy Temsilci Olga Kurışko Türkiye Cumhuriyetiniñ Tışqı işler naziriniñ muavini Berris Ekinci hanımnen bir arağa keldi. Körüşüvde ayrıca Ukrayinanıñ Türkiyedeki Fevqulâde ve Salâhiyetli Elçisi Nariman Celâl ile elçilikniñ hadimleri iştirak ettiler.

Daimiy Temsilci Türkiyeniñ Ukrayinanıñ topraq bütünligine ve Qırımnıñ işğalini tanımama siyasetine ardı-sıra desteklegenini, em de Qırım platformasınıñ çeşit seviyedeki sammitlerinde iştirak etmesini minnetdarlıq qayd etti.

Olga Kurışko işğal etilgen Qırım yarımadasındaki vaziyet, siyasiy taqipler ve qırımtatar halqına qarşı artqan repressiya ve taqipleri aqqında malümat berdi. Tecavuzcı devletniñ em işğal etilgen yarımada topraqlarınıñ, em de Qara deñizniñ keñ ölçüli askerleştirilmesine yönelik siyaseti sebebinden medeniy miras obyektleriniñ yoq etilmesine ve Qırım ekologiyası içün aqibetlerge ayrıca diqqat ayırıldı. Rusiyeniñ “kolge flotu“ etrafındaki vaziyet ve onıñ Azaq ile Qara deñiz bölgesindeki bütün memleketlerge telükesi muzakere etildi.

Körüşüvniñ soñunda Olga Kurışko Ukrayina ve Türkiye arasındaki adaletli barışıqqa irişmek içün diplomatik yollarnı tapmaq, em de Ukrayinanıñ, şu cümleden Qırımnıñ topraq bütünligini tiklemek içün ilerideki işbirlikniñ müimligini qayd etti.