Mayısnıñ 27-nde Temsilcilikte Daimiy Temsilci Olga Kurışko Ukrainada Yaponiyanıñ Fevqulâde ve Salâhiyetli Elçisi Masaşi Nakagomenen körüşüv keçirdi. Körüşüvde Qırım platformasınıñ faaliyetini temin etüv hızmeti yolbaşçısınıñ muavini Anna Sitnikova ve hızmetniñ baş mesleatçıları Nelâ Grinişin ve Tetân Nepomaşça iştirak ettiler.

Körüşüv vaqtında Temsilci Ukraina topraq bütünligine qol tutqanı içün Yaponiyağa minnetdarlığını bildirdi, elçi efendige Temsilcilik tedbirlerinde, şu cümleden Qırım işğaline qarşılıq Künü Forumına, qırımtatar halqı genotsidi qurbanlarınıñ hatırasına bağışlanğan merasimlerge ve diger tedbirlerge qoşulğanı içün teşekkür bildirdi. O, keçken sene Yaponiya ükümetiniñ rus fizikiy ve uquqiy şahıslarına ve işğal etilgen Qırımda rus işğalci memuriyetiniñ ayrı vekillerine qarşı sanktsiyalar kirsetilgenini de qayd etti.

Qırım platformasınıñ faaliyetini temin etüv hızmetiniñ taqımı işğal etilgen Qırımdaki aktual vaziyet aqqında malümat berip, Temsilcilikniñ Qırımğa nisbeten reintegratsiya siyasetini azırlav saasında faaliyetini taqdim etti. Hususan, işğalden soñ Qırımnı ğayrıdan tiklev Strategiyasına diqqat celp etildi. İşğalcilerniñ cinayetleri qayd etildi: işğal etilgen Qırımda insan aqlarınıñ bozulması; balalarnıñ sürgün etilmesi; yarımadanıñ askeriyleştirüvi; medeniy mirasnıñ yoq etilmesi ve ilâhre.

Körüşüvde ukrain studiyalarınıñ, şu cümleden qırımtatar studiyalarınıñ Yaponiyada ilerilemesiniñ müimligine ayrı diqqat ayırıldı. Temsilcilik taqımı Ukraina birinci qadını Olena Zelenskayanıñ teşebbüsi ile teşkil etilgen Ukrain studiyalarınıñ Global koalitsiyasınıñ faaliyeti aqqında malümatnen paylaştı.

Körüşüv vaqtında Temsilcilikniñ taqımı yapon auditoriyası arasında rus mifleri ve añlatuvlarnıñ yoq etilmesi maqsadınen ve Qırımnıñ tarihını daa da yayğınlaştırmaq içün çeşit tanıtuv teşebbüsleri aqqında aytıp berdi.

Ukrainağa çeşit saalarda, hususan memleketimizniñ ğayrıdan qurulmasına yardım etüv ve topraq bütünligine qol tutuv meselesinde destek köstergeni içün Yaponiyağa teşekkür bildiremiz.