Ukraina Prezidenti Volodımır Zelenskıy qırımtatar halqınıñ vekilleri ile körüşti.

Devlet başlığı Qırımtatar halqınıñ genotsid qurbanlarını añuv künü munasebeti ile taziye bildirdi.

”Sürgünlik qırımtatar halqınıñ, Ukraina halqınıñ ve toprağımıznıñ eñ büyük facialarından biri olğanını epmiz añlaymız. Biñlernen qırımtatar horantaları zorbalınen öz ana toprağından quvuldı. Elâk olğanlarnıñ ruhları şad olsun”, – dep ayttı Volodımır Zelenskıy.

Prezident tarihımıznıñ bu facialı saifesi aqqında ukrain balalarnıñ haberdar etilmesi pek müim olğanını qayd etti. Onıñ içün ”Bütünukrain onlayn mektep” tasil leyhası bügün qırımtatar halqınıñ sürgün etilmesine bağışlanğan dersni köstere.

”Er bir insan özüni Ukraina vatandaşı olaraq is ete bilecek bir devlet qurmağa isteymiz. Öz halqınıñ tarihını ve adetlerini unutmayıp, özüni tolu manada vatandaş is etmelerini ister edim. Sizge tek sözlernen degil de, areketlerimiznen, qanunlar vastasınen qol tutmağa isteymiz”, – qırımtatar halqınıñ vekillerine muracaat eterek, dep bildirldi Devlet başlığı.

Volodımır Zelenskıy eñ yaqın künlerde Qurban ve Oraza Bayramlarına devlet diniy bayramları statusını bergen qanunnı imzalaycağı aqqında haber etti.

Prezident qırımtatarlar öz halqını eñ yüksek diplomatik seviyede temsil etmek kerek olğanlarını qayd etti. Onıñ içün devlet başlığı Emine Cepparnıñ namzetini çetel işler naziriniñ birinci muavini vazifesine tayın etti.

Qırımtatar halqınıñ meselelerini çezmek maqsadınen Volodımır Zelenskıy terkibinde qırımtatarlar olacaq iş gruppasını Prezident Ofisi çerçivesinde teşkil etmege teklif etti.

”Pek tez areket etmemiz içün bu iş gruppası bizge teklifler berecek, biz bu tekliflernen almaşacaqmız”, – dep ayttı Prezident.

Vladımır Zelenskıy, Türkiye Prezidenti Recep Tayıp Erdoğan ile añlaşma neticesinde Herson vilâyetinde Qırımdan köçken adamlar içün 500 daire qurulacağını haber etti. Prezident topraq ayıruv, dairelerni quruv meselesinde iç bir problem olmağanını bildirdi. Herson vilâyeti devlet memuriyetiniñ reisi bu avaleniñ yerine ketirilmesini temin etecek. Volodımır Zelenskıy iş gruppasında qırımtatarlar içün mesken ayırılması ile bağlı meselelerni muzakere etmege teklif etti.

Bundan ğayrı, Kıyivde yañı balaban caminiñ qurulması planlaştırıldı. Prezident qırımtatarlardan işbu caminiñ leyhasını beklegenini ve oña qol tutmağa azır olğanını qayd etti.

Bundan ğayrı, Herson vilâyetiniñ Qırım Muhtar Cumhuriyeti ile sıñırında balaban hab qurulacaq.

”Vaqtınca işğal etilgen Qırım toprağında vaqtınca yaşağan insanlar qırımlılarğa, qırımtatarlarğa nasıl munasebette bulunğanımıznı körsinler. Anda barıp, kerçekten de başqa manzara, devletimizniñ ”vitrinasını” körsinler”, – dep ayttı Volodımır Zelenskıy.

Prezident qayd etti ki, iş gruppası yalıñız uquqiy meselelerini degil de, qırımtatarlarnı raatsızlağan iqtisadiy meselelerni de muzakere etmeli.

Qırımtatar halqınıñ lideri Mustafa Cemilev sürgünlik qurbanlarını añğan Prezidentke öz minnetdarlığını bildirdi.

“Bügün sürgünlikniñ 76-yıllığı böyle seviyede qayd etilgeni içün pek minnetdarmız, bilgenim qadar, qırımtatar bayrağınıñ resimi bügün Nazirler Şurasınıñ ve Prezident Ofisiniñ binalarında numayış etilecek. Bügün neşir etilgen beyanatlar, Çetel işler nazirliginiñ avalesi içün minnetdarmız. Ümüt etemiz ki, Qırım meselesi, Qırımnı Ukrainağa qaytaruv ve Ukrainanıñ topraq bütünligini ğayrıdan tiklev meseleleri devletimizniñ reberiyetiniñ kün tertibinden iç bir vaqıt yoq olmaycaq”, – dep ayttı Mustafa Cemilev.

Bundan ğayrı qırımtatar halqınıñ lideri qırımtatar halqınıñ meselelerinen oğraşacaq iş gruppasınıñ teşkil etilüvinen bağlı Prezident qararına qol tuttı.