Prezident Petro Poroşenko, onıñ ilk nevbetteki vazifeleri arasında Qırımnı azat etüv olğanını qayd etti. ”Şunı aytmağa isteyim ki, saylavlardan soñ ilk vazifelerimden biri, Qırım meselesi olacaqtır. Qırımlılarğa çoqtan-çoq teşekkür etem. Maña qol tutqan Qırımtatar Milliy Meclisine, Mustafa Cemilevge, Refat Çubarovğa, Ahtem Çiygozğa çoqtan-çoq teşekkür etem. Menim içün bu pek muim meseledir”, – ukrain telekanallarına bergen intervyusında dep ayttı devletimizniñ Başlığı.

”Başqalarğa oşap, Qırımnı satılıqqa çıqarmaycaqmız. «Qırım meselesini başqa vaqıt, kelecekte çezermiz», demeycekmiz. Bu menim beyanatım, Qırım kün tertibiniñ birinci satırlarında olacaqtır”, – dep qayd etti Prezident.

Onıñ sözlerine köre, al-azırda Qırımnı işğalden azat etüv boyunca çoqmilletli platformamız mevcüt. ”Bu platformada pek çoq memleket iştirak ete. O, bu cümleden BMT Baş assambleyası şekilinde de teşkil etildi. Ve o çoqtaraflıdır”, – dep qoştı o.

Prezident qayd etti ki, birinci yönelişi – sanktsiyalardır:  «”Rusiyege qarşı qabul etilgen sanktsiyalar çalışmay” degenlerge inanmañız. Qırım içün sanktsiyalar, Donbas içün sanktsiyalar, Keriç boğazı içün sanktsiyalar, kene de sanktsiyalar, sanktsiyalar… Rusiye bu fiyatnı Ukrainağa qarşı yapqan tecavüzi içün ödey».

O, şunı da qayd etti ki, ”Bloomberg” agentliginiñ malümatlarına köre, Rusiye iqtisadiyatı 150 milliard dollarnı, yani Rusiye umumiy içki mahsulatınıñ 10% ğayıp etti. Yaşayış seviyesi tüşti.

”Sanktsiyalar – bu mesüliyet ya da ceza degil. Sanktsiyalar – bu Rusiyeni muzakereler masasına oturtacaq ve qarar aldıracaq vasta. İşğal etilip, deşetli vaziyette bulunğan Donbas topraqlarında işsizlik seviyesi 50% ziyade, strategik şirketler yoq etildi, viran etildi, donatuvları alıp ketildi. Balalar tasil hızmetlerine irişemey qaldı, ilaçlar yoq, yaşayış seviyesi epeyi tüşti. Ya Qırımda? Neler olğanına baqıñız. Qazançlar bayağı tüşti. Al-azırda insanlar ”pempe közlüklerini” çıqarıp, aqiqatnı körmege başlaylar”, – dep ayttı Prezident.

Petro Poroşenko qayd etti ki, sanktsiyalar vastasınen, BMT Halqara mahkemesiniñ, deñiz uquqı boyunca tribunalnıñ ve başqa mahkemelerniñ qararları vastasınen, çetel yatırımlarnıñ zapt etilüvi içün ödengen büyük, çoqmilliardlı cöremeler vastasınen Ukraina öz topraqlarını qaytarır. «Ukraina çetel işler Nazirliginde, ukrain Ükümetinde teşkil etilgen koordinatsıon gruppa da, Rusiyege adım-adım ücüm etip, ondan Qırımnı azat etmege talap etmekte», – dep qayd etti o.