Donbass ve Qırım mevzusına toqunmayıp, Ukrainanıñ inkişafı aqqında laf yürsetmek mümkün degil. Böyle Ukraina prezidenti Volodımır Zelenskıy, dedi Torontoda Ukraina islâatı meseleleri boyunca konferentsiyada, dep haber ete devlet başınıñ matbuat hızmeti.

“Topraqlarımız ve esirlerimizniñ qaytarılması, barışıq olması – bu eñ müimi. Vatandaşlarını tüşüngen devlet birinciden bunı yapmalı. Ve bu vazifeni yardımıñız olmasa, biz becerip olamamız”, – konferetsiya iştirakçilerine muracaat etip, dedi Zelenskıy.

Onıñ aytqanına köre, Ukraina eki eñ büyük meselesi bar. Birincisi – iqtisadiy. Şimdiki esapqa köre, Donbassnı ğayrıdan qurmaq içün 10 milliard yevro kerek.

“2019 yılı küzde biz Mariupilde buña bağışlanğan forumnı keçirecekmiz, anda Donbassta infrastruktura ve gumanitar leyhalarğa aqça ayırmağa azır olğan çetel yatırımcılarnı davet etecekmiz”, – dedi prezident Zelenskıy.

Ekincisi ise, onıñ aytqanına köre, informatsion mesele. Ukraina tek topraqlarını degil de, adamlarını da qaytarmaq kerek, dep ayttı prezident.

“Olar Ukrainanen bağnı coymamaq kerek. Bu bizim vatandaşlarımız. Ve bugün olar qorqalar. Olarnıñ ukrain pasportı bar, olarğa “LNR” ve “DNR” “pasportlarını” bereler, şimdi ise daa Rusiye pasporstlarını teklif eteler. Qorqalar, çünki “Kimmiz?” sualinde olarnı şaşmalatmağa tırışalar. Olar – ukrainler. Qaysı tilde laf etseler de. Ve biz olarnıñ qaytmasını istesek, bunı bütün memleket añlamaq kerek. Ebet, bu ortağa çıqqan mesele Ukraina içün pek qıyındır. Donbass ve Qırım – Ukrainanıñ olğanlarını tekrarlamaqtan iç bezmecekmiz”, – dedi Ukraina prezidenti.

Vladimir Zelenskiyniñ aytqanına köre, Donbas ile Qırım Ukraina topraqları olğanını niayet Rusiye reberiyeti eşitmeli ve añlamalıdır.

‘‘Bütün dünya bunı bar sesnen aytmalı. Boldurmadan. Bu yalıñız Ukrainağa degil, epiñizge de kerek. Çünki Qırımnıñ qaytarıluvı ve Donbastaki tınçlıq em Avropanıñ, em bütün dünyanıñ raat yuqusını temin eter. Bu aqta nevbetteki sefer sanktsıyalarnı muzakere etken vaqıtta hatırlañız’’, – Konferentsiya iştirakçilerine muracaat eter eken, dep qayd etti devlet Başlığı.

Menba: https://www.president.gov.ua/news/volodimir-zelenskij-u-kanadi-mi-nikoli-ne-vtomimos-povtoryuv-56177