Mayısnıñ 18-nde Kyivdeki Mır Skverinde qırımtatar halqı genotsidi qurbanlarınıñ hatıra Kününe bağışlanğan merasim olıp keçti. Tedbirde Ukrayina Prezidenti Volodımır Zelenskıy ve apayı Olena Zelenska iştirak ettiler. Olar 1944 senesi sovet akimiyeti tarafından tuvğan toprağından sürgün etilgen yüz biñlernen qırımtatarı hatırasına memorialğa çıqarlar qoydılar.

Hatıra merasimine devlet akimiyeti organlarınıñ ve Qırımtatar Milliy Meclisiniñ vekilleri de qoşuldı.

Ukrayina Prezidenti Volodımır Zelenskıy çıqışta bulunıp, Ukrayina qırımtatar halqınıñ sürgünlik qurbanları aqqında hatıra saqlağanını ve adalet tiklenmesi içün küreşni devam etecegini qayd etti. Onıñ sözlerine köre, Rusiye bugün de qırımtatarlarnı öz evlerinde ve tuvğan topraqlarında yaşama aqqından marum etmege tırışa, amma Ukrayina halqara destekni quvetleştire, öz devletini pekite ve vaqtınca işğal etilgen topraqlarnı qaytarmaq içün küreşni devam ete.

”Halqımız öz mustaqilligini kimsege bermege mümkün olmağanını yahşı bile. Biz bütün topraqlarımıznı qaytaracaqmız ve er kes aqqında hatırlaymız”, – dep qayd etti Volodımır Zelenskıy.

Bundan soñ qırımtatar halqınıñ lideri, Ukrayina halq deputatı Mustafa Cemilev çıqışta bulundı. O, on biñlernen insannıñ canını alğan 1944 senesi sürgünlik faciası aqqında hatırlattı. Mustafa Cemilevniñ qayd etkenine köre, sürgünlikten soñ qırımtatarlar on yıllar devamında uquqsızlıq ve zulum şaraitlerinde yaşadı, sürgünlik cinayeti aqqında ise yıllardır dünyada kimse bilmey edi. O ayrıca, Ukrayina istilâcı devletke yol berüvni közde tutqan iç bir “barış planına” razı olmağanını ifade etti.

”Sürgünlik ve genotsid – qırımtatar halqınıñ tarihiy ve genetik hatırasında ebediyen qalacaq facialardır”

Qırım Muhtar Cumhuriyeti musulmanları Diniy idaresiniñ Müftisi, şeyh Ayder Rustemov, qırımtatar halqınıñ sürgünligi genotsidiniñ qurbanları hatırasına dua oqudı.