Ukrayina prezidenti Volodımır Zelenskıy dünya liderlerini Rusiyeniñ yapqan areketleriniñ normalleşmesine yol bermemege çağırıp, Rusiye tarafından işğal, repressiyalar ve cinayetler halqara ayatnıñ adiy adiseleri olaraq qabul etilmemesi kerekligini qayd etti.

“İşğal altındaki arbiy olmağan vatandaşlar aqiqat içün, azatlıqqa ıntıluvları içün ve öz kimliklerini saqlamağa tırışqanları içün repressiyalarğa oğratılalar. Lâkin dünya işğal ve repressiyalarnı halqara ayatnıñ adiy adiseleri olaraq qabul etmemeli. Biz halqara uquq ve temel insan adaleti içün küreşemiz”, – dep qayd etti Ukrayina Prezidenti Volodımır Zelenskıy.

O, Qırımnıñ arbiy bazağa çevirilmesi ve yañı istilâ içün bir platsdarm olaraq qullanılması telükelerine, em de arbiy olmağan sakinlerge, hususan Ukrayina tamır halqı olğan qırımtatarlağa qarşı repressiyalarğa diqqat ayırdı. Ukrayina prezidenti, sanktsiyalar Rusiye arbiy maşnası içün ciddiy problemler yaratmağa endi başlağanını, lâkin arbiy olmağan ealiniñ qıynaluvları ala daa devam etkenini qayd etti.

Prezident ortaqlarğa birdemlik içün minnetdarlıq bildirip, Rusiye cenkni toqtatmağance ve işğal etilgen ukrayin topraqlarından çekikmegence sanktsiyalar rejiminiñ devam etilmesiniñ müimligini qayd etti.