2017 senesi avgust 21 künü Herson vilayeti devlet memuriyetinde Ukraina Prezidentiniñ Qırım MC-deki Daimiy Temsilcisi Boris Babin ve onıñ Birinci muavini İzet Gdanov, Qırımtatar halqınıñ meseleleri boyunca Ukraina Prezidentiniñ yardımcısı Mustafa Cemilev, uquq qoruyıcı organları ve icra akimiyetniñ vekilleri ile körüşüv devamında Qırım mevzusınen bağlı bir sıra mesele muzakere ettiler.

İlk-evelâ, vaqtınca işğal olunğan topraqlarnıñ sakinleri Herson vilâyetinde çezmege tırışqan tasil ve migratsiya saalarında aktual meseleler aqqında söz yürsetildi.

Bundan da ğayrı, toplaşuv iştirakçileri Qırım ile memuriy sıñırdan keçüvge diqqat ayırdı. Boris Babin qayd etkenine köre, meseleler çoqtan belli, şimdi ise olarnı niayet çezmege vaqıt keldi.

Qırım sakinlerine memuriy hızmet berüv saasında qaparcılıq meselesine ayrıca diqqat ayırıldı.

Bu saada ilk nevbette Ukraina ükümetiniñ № 1035 qararına Qırım ile administrativ sıñırından şahsiy şeylerni keçirmege qolaylaştırğan deñişmeler kirsetmege kerek.

Muşavereden soñ, toplaşuv iştirakçileri Herson vilâyeti devlet memuriyetiniñ başlığı ile beraberlikte Devlet migratsiya hızmetini ziyaret ettiler.