Adet üzre, saban ayınıñ (mart) 8 künü dünyanıñ medeniy halqları BMT tarafından tanılğan Qadınlarnıñ aqları içün küreş ve dünyada barışıq halqara kününi qayd eteler.

2014 senesi saban ayınıñ aynı künlerinde Qırımda qadınlar cinaiy işğalge qarşılıq kösterip, zorbalıqsız kütleviy aktsiyalarnı keçirgenleri pek teren manalı bir adisedir. Bügün 4 yıl içinde Qırımda siyasiy cezalavlarnıñ qurbanlarına çevirilgen qadınlarnı, evlerinde işğalcilerniñ ve olarnıñ qafadarlarınıñ qanlı, kirli çızmalarına dayanmağa mecbur olğan qadınlarnı, rus istilâsı sebebinden öz yaqınlarını ğayıp etken qadınlarnı hatırlamalımız.

Qadın askerler, gönülliler, uquq qorçalayıcılar, ekimler, bu ağır vaqıtta duşmannıñ tecavüzine qarşılıq kösterip Ukrainanı qorçalağan ve yarımadanıñ işğalden azat etilüvinde ve ğayrıdan integratsiyasında iştirak etecek er kes bügün ayırca diqqatqa lâyıqtır. Çünkü bütün erkeklernen qadınlar Ukrainanıñ territorial bütünligi ve birdemligi ğayrıdan tiklengenden soñ meydanğa kelecek tınçlıq içün küreşmeli, o da qadın aqlarınıñ qorçalavına esas kefalet olur.