2019 senesi ilk qış (dekabr) ayı 19 künü Avropa ve Avropa-atlantık integratsiya meseleleri boyunca Ukraina Baş naziriniñ muavini Dmıtro Kuleba, Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç ve Herson vilâyeti devlet memuriyetiniñ reisi Yuriy Gusev Herson vilâyeti ile vaqtınca işğal etilgen Qırım arasındaki memuriy sıñırda “Qalançaq” KÇNN-nıñ yañı hızmet zonasını açtılar.

Baş naziriniñ muavini ayrıca qayd etti ki, bu keçit noqtası ve hızmet zonası vaqtınca çalışacaq, Qırım yarımadası işğalden azat etilgen soñ, olar kereksiz olur.

Ukraina Prezidenti Volodımır Zelenskiyniñ teşebbüsini peq qısqa müddet içinde, yani bir qaç ay devamında Herson vilâyeti devlet memuriyeti, Ukraina infraterkip nazirligi ve «Ukrzaliznitsâ» yerine ketirdiler. Ukraina Prezidentiniñ Qırım MC-deki Temsilciligi bu ceryanğa, hususan KÇNN-da memuriy hızmet merkezleriniñ açılmasına qol tuttı.

Avropa standartları insanlarğa ürmet manasına kele. ”Qalançaq” KÇNN-da endi böyle zemaneviy ava üküm süre. Çünki bu yer Avropadır. Künleriniñ birinde anda da öyle olur. Ukraina ile beraberlikte.

Qoşma malümat:

“Qalançaq” KÇNN-daki hızmet zonasına:

• Herson, Odesa, Zaporijjâ, Dnipro, Kıyiv, Nova Kahovka şeerleri ile naqliyatnı (künde 5-10 sefer) temin etken avtobus stantsıyası;
• yolcular ve aydavcılar içün raatlanuv yerleri;
• Memuriy hızmet merkezi – ilk adliy yardım, mesleatlar bergen noqta, ”Pasport” hızmet merkezi;
• tükânlar, qavehaneler kireler.

Hızmet merkezinden künde bir biñ kişi keçe bile. Uzunlığı – 100 m.

Hızmet merkezi Mırnenska köy cemiyetiniñ balansında buluna. Tamirlev işlerinen Herson vilâyetiniñ devlet memuriyeti oğraştı. Qurucılıq işlerine 60 mln. grn. masraf etildi. ”Çonğar” ve ”Qalançaq” KÇNN-larda hızmet merkezlerini «Ukrzaliznitsâ» AC qurmaqta (Ukraina Nazirler Şurası 04.07.2018 qabul etken № 584 qarar boyuca qurucılıqqa 105 mln 983,6 biñ grivnâ ayırıldı).

”Qalançaq” KÇNN-daki gümrük nezareti noqtasında piyadeler içün vatandaşlarnıñ yüklerini resmiyleştirgen gümrükçiler çalışa, pasport nezaretini yapqan pencerelerde Ukraina qıtasından kelip ketken vatandaşlarnıñ vesiqalarını teşkergen arbiyler hızmet etmekte.

”Qalançaq” KÇÇN-da açılğan memuriy hızmet merkezi Çaplınska ayrı territorial cemiyetindeki memuriy hızmet merkeziniñ terkibine kirmekte. Çaplınska ve Mirnenska ayrı territorial cemiyetleri arasındaki munitsipalitet arası işbirlik aqqında añlaşmağa binaen, mında vaqtınca işğal etilgen Qırım MC kelgen vatandaşlarğa ve Qalançaq rayonınıñ KÇNN ile qomşu mesken yerlerniñ sakinlerine 37 çeşit hızmet berilecektir. Bu cümleden, pasport hızmetleri, mülk ve iş qaydları ile bağlı çeşit türli hızmetler berile. Bu cedvel ket-kete kenişleycek (bu cümleden, içtimaiy hızmetlerniñ, Devlet geologik kadastr ile bağlı hızmetlerniñ qoşulması planlaştırıla).

Ükümet portalı