Kiyev vilâyetiniñ prokuraturası Ukraina havfsızlıq hızmetiniñ hadimleri ile beraberlikte Ukraina KPK-niñ 208 maddesine esaslanıp, sahte Ukraina vatandaşınıñ içki ve çetel pasportlarını Ukraina ve çetel memleketlerniñ vatandaşlarına satıp ve böyleliknen qanunsız migratsiya kanalını teşkil etken 3 kişini yaqaladı. Cinaiy gruppa Asiya memleketleri, Rusiye Federatsıyası ve Ukraina vatandaşlarından ibaret edi.

Haber etilgenine köre, cinayetçiler 6 biñ AQŞ dolları qarşılığında Ukraina vatandaşınıñ içki ve çetel pasportlarını yasap, talimatlar vastasınen Ukraina devlet sıñırında nezaretten problemsiz şekilde keçmege yardım ete ediler. Pasportlarnıñ blankları işğal ve anneksiya etilgen Qırımdan ketirilgen.

Cinayetçilerniñ evlerinde qanuniy şekilde keçirilgen tintüvlerniñ neticesinde 15 sahte pasport ve 108 biñ grivna miqdarında peşin para tutıp alındı. Tutuqlanğan şahıslarğa qabaatlav aqqında bildirüv azırlana, cinayetçilerni azatlıqtan marum etilüv şekilinde ihtiyat çaresi bekley.