2017 senesi dekabr 27 künü Temsilcilikniñ vekilleri Ekinci cian cenki tarihi boyunca Ukraina milliy müzeyinde, Qırım MC-de medeniyetniñ vaziyetine ve medeniyet saada aq-uquqlarnıñ temin etilüvine bağışlanıp keçirilgen ”Qırım 2014-2017: işğal etilgen medeniyet’’ serlevalı halqara konferentsiyada iştirak ettiler. Merasimde devlet idareleriniñ vekilleri, Ukraina halq deputatları, alimler ve Skype vastasınen Qırımdan cemaat faalleri iştirak ettiler. Konferentsiya panel muzakeresi şekilinde keçti. Esas maruzacı vazifesini Ukraina medeniyet naziri Yevgen Nişçuk, Ukraina halq deputatı, Qırımtatar Milliy Meclis reisi Refat Çubarov, Ukraina halq deputatı, Ukraina Yuqarı Şurasında medeniyet ve ruhaniyet boyunca Komitetiniñ reisi Mıkola Knyazitskiy becerdiler.
Konferentsiya devamında işğal etilgen Qırımda medeniyetniñ vaziyeti ve vatandaşlarnıñ medeniyet saasında aq-uquqlarını temin etüv, medeniy asabalıqnıñ (abideler, qoruqlar, müzey toplamları ve Ukraina müzey fondı) qorçalavını temin etüv, işğalci akimiyetniñ til siyaseti, işğal şaraitlerinde medeniyet saasındaki insan aq-uquqlarını temin etüv, 2014-2017 seneleri devamında Qırımda qanunsız şekilde keçirilgen arheologik qazmalar kibi meseleler talil etildl. Konferentsiya iştirakçileri, vaqtınca işğal etilgen topraqlarda diniy teşkilâtlarnıñ, etnik cemiyetlerniñ ve insan aq-uquqlarınıñ bozuluvını muzakere ettiler. İşğalci akimiyet tarafından Bağçasaraydaki Hansarayınıñ bozuluvı, Ukraina müzey fonduna ve ukrain halqına ait olğan müzey toplamlarını elge keçirmek maqsadınen Rusiye uquqınıñ qolaylaştırıluvı meseleleri de köterildi. Konferentsiya iştirakçileri ayrı müzey toplamlarınıñ vaqtınca numayş manaçıqnen Qırımdan çıqarılıp, Qırım müzeylerine qaytarılmağanı aqqında bildirdiler. Bağçasaraydaki Hansarayınıñ aqıqıylığını qısmen bozğan ve bu abideniñ tamamen yoq etmekni maqsat olaraq qoyğan restavratsiya işleri boyunca fotomalümatlar numayış etildi.
Konferetsiya iştirakçileri işğalci akimiyetniñ qanunsız areketlerine faal şekilde qarşılıq köstermege, halqara teşkilâtlarğa, cemiyetlerge muracaatta bulunmağa ve Ukrainanı Gaaga konferentsiyasınıñ silâlı istilâ şaraitlerinde medeniy asabalıqnıñ qorçalavı boyunca 1954 senesi imzalanğan Ekinci protokolına qoşulmağa çağırdılar. Konferentsiya neticesinde ”Qırım 2014-2017: işğal etilgen medeniyet” serlevalı rezölütsiya azırlandı, işbu rezölütsiyada konferentsiya teşkilâtçıları ve iştirakçileri halqara cemiyetni, halqara teşkilâtlarını, devletlerniñ ükümetlerini, siyasetçilerni, medeniyet ve sanat erbaplarını Qırımnıñ misli olmağan medeniy asabalığını qorçalamaq içün küreşlerini toqtatmağa çağırdılar. Ukraina Prezidentine, Ukraina Yuqarı Şurasına ve başqa idariy organlarına uquqiy-normativ aktlarnı qabul etip, Qırım MC-de medeniyet saasında qanunlarınıñ bozuluvına qarşı kereki areketlerni yapmağa muracaata bulundılar.
Ukraina Prezidentiniñ Qırım MC-deki Temsilciligi Qırımda Ukraina devletiniñ ve vatandaşlarınıñ medeniyet saasındaki menfaatlarınıñ qorçalavında faal iştirak etip, halqara teşkilâtlarda ve ecnebiy memleketlerde uquqiy ve siyasiy faaliyetni yürsetken selâhiyetli icra akimiyet organlarınen işbirligini faalleştire.
Milliy politsiyanıñ Qırım MC ve Aqyar şeeri boyunca Baş idaresiniñ Temsilcilikniñ teşşebüsi ile Herson vilâyetine keçirilmesi ve ükümetniñ 2015 senesi dekabr 16 künü qabul etilgen № 1035 qararına icra akimiyet organları tarafından deñişmeler azırlanması memuriy sıñırdan medeniy degerleriniñ keçirilüvini tertipke qoymağa yardım eter.
Uquq qorçalayıcı organlarnıñ işğalci akimiyet tarafından ”Tavrida” yolunıñ qanunsız şekilde qurulmasına qarşılıq köstermesi de pek muimdir. Bu qurucılıq esnasında işğalci akimiyetke boysunğan hızmetler arheologik abidelerni yoq eteler, hırsızlaylar ve yarımadadan alıp keteler.
Qırımnıñ işğali şaraitlerinde devletke ait olmağan Qırım MC-niñ mülkiyeti içün mesuliyetli olğan akimiyet organı belgilenmeli. Bu sırağa Qırımda bulunğan, medeniy ve tarihiy qıymeti olğan bir qaç obyekt kirmekte.
İşğalci akimiyet tarafından qırımtatar ve ukrain tilleriniñ, ukrain milletiniñ ve Qırımnıñ tamır halqınıñ mütenasip informatsion ve tasil aqlarınıñ sıqıştırıluvı Temsilcilikniñ daimiy nezareti altında bulunmaqta. Temsilcilik Ukraina medeniyet nazirligine Ukrainanıñ tamır halqlarınıñ mütenasip aqlarınıñ qorçalavını maqsat qoyğan qanun yaratıcılıq faaliyetini yürsetmege muracaatta bulundı, vaziyetniñ nezareti maqsadınen Ukrainağa BMT-nıñ tamır halqlarınıñ aqları boyunca temsilcilerini davet etmege teklif etti.
Ukrain milletiniñ, Qırımnıñ tamır halqınıñ ve Qırımdaki milliy azğınlıqlarınıñ aq-uquqlarınıñ qorçalavı meselesi Temsilcilik tarafından AHIT-nıñ Viyana şeerinde tedbirlerinde ve halqara teşkilâtlarınen ağımdaki işbirligi esnasında köteridi.
Geniçesk rayonınıñ Novooleksiyivka qasabasında qıta Ukrainada qırımtatar tilinde tasil bergen yekâne mektepteki vaziyet Temsilcilikniñ mahsus nezareti altında bulunmaqta.