2018 senesi ilk qış (dekabr) ayı 27 künü Qırım evinde biteyatqan yıl devamında vaqtınca işğal etilgen Qırımda ve onın etrafında olıp keçken vaqialar boyunca qırımtatar halqınıñ lideri, Ukraina Yuqarı Şurasınıñ deputatı Mustafa Cemilev ile halq ögünde munaqaşa keçirildi.

Mustafa Cemilev yarımadanı arbiyleştirüv ve qırımtatar halqını taqip etüv boyunca rusiye işğalcileriniñ areketlerini, Qırımdaki demografik ve ekologik vaziyetlerni, Ukrainanıñ vaqtınca işğal etilgen Qırım MC meselelerinen oğraşqan Ukraina akimiyet ve uquq qorçalav organlarnıñ semereligini ve qırım meselesi boyunca çetel devletler ve halqara teşkilâtlar tarafından Ukrainağa kösterilgen yardımnı talil etti.

O, Ukrainada Prezident ve Parlament saylavları ve halqara vaziyetniñ daimiy deñişüvi şaraitlerinde Qırımnı işğalden azat etüv oğrunda kelecekteki küreşniñ maqsatlarını qayd etti.

Bundan ğayrı, Mustafa Cemilev Ukraina Prezidentiniñ avalesi boyunca çağırılğan iş gruppası Ukraina Esas qanunına Qırım toprağında milliy muhtariyetniñ teşkil etilüvi ile bağlı olaraq yapılacaq deñişmeler boyunca çalışuvnı bitirgeni aqqında bildirdi ve Esas qanun komissiyası eñ yaqın vaqıtta onı tasdıq etecegine ve Ukraina Yuqarı Şurasınıñ şimdiki terkibi onı birinci diñlevde qabul etip, Ukraina Esas qanun mahkemesine yollaycağına eminligini bildirdi.

Tedbirde Temsilcilikniñ Kıyiv şeerindeki ofisiniñ hadimleri iştirak etti.