Bugün, ilk yaz ayınıñ 28-de, Ukraina Prezidenti Volodımır Zelenskıy ”Ukraina Anayasa Künü munasebeti ile Ukraina devlet mükâfatlarınen mukâfatlandıruv aqqında” 274/2021 sanlı fermanını imzaladı, Ukraina Prezidentiniñ Qırım Muhtar Cumhuriyetindeki Temsilciliginiñ teklifine binaen Qırım abulqatı Emine Avamilevağa ”Ukrainada nam qazanğan adliyeci” unvanı berildi, bu munasebet ile Emine hanımnı Temsilcilik adından hayırlaymız.

Emine Avamileva 1990 senelerinden başlap Ukrainada grajdan cemiyetini meydanğa ketirüvni ve inkişaf ettirüvni, uquq üstünligini vucutqa ketirüvni maqsat etip qoyğan bir sıra leyhalarnı amelge keçirip idare etti.

2014 senesinden berli abulqatlıq saasında esas faaliyeti Qırım tamır halqı olğan ve milliy mensüpliklerini saqlamağa tırışqan qırımtatarlarnıñ aq-uquqlarını qorçalavğa bağışlana, o, vaqtınca işğal etilgen Qırım Muhtar Cumhuriyeti ve Aqyar şeeri topraqlarında siyasiy sebeplerden taqip etilgen Ukraina vatandaşlarınıñ imayecisi-abulqatı olaraq davalarda iştirak etmektedir.

O, 2018 senesiniñ boş ayında Rusiye Federatsiyası tarafından Keriç boğazında başqa ukrain deñizcileri arasında esirge alınğan Zinçenko Vâçeslav Anatoliyovıçnıñ abulqatlarından biri edi.

Yüksek devlet mükâfatına lâyıq olğan Emine hanımnı bir kere daa hayırlaymız, vaqtınca işğal etilgen Qırımda insan aqlarını qorçalamağa devam etken er bir vatandaşımızğa böyle mükâfatlarınıñ berilmesi oğrunda qolumızdan kelgenini yapacaqmız.

Fotosüret Emine Avamilevanıñ Facebooktaki saifesinden alındı