2018 senesi qural ay (mayıs) 24 künü Ukraina Prezidentiniñ Qırım MC Daimiy Temsilcisi Borıs Babin, onın Birinci muavini İzet Gdanov ve Temsilcilikniñ başqa hadimleri Ukraina Yuqarı Şurasınıñ komitetlerinde Tışqı siyaset, havfsızlıq ve diplomatiya boyunca açıq kafedra çerçivesinde ‘‘Qırım – adaletsizlik bölgesi: havfsızlıq, qorçalav, qarşılıq kösterüv’’ mevzusında Dörtünci körüşüvde iştirak ettiler.

Temsilcilik tarafından teşkil etilgen tedbirde Ukraina Yuqarı Şurası Başlığınıñ Birinci muavini İrına Geraşçenko, Ukraina Yuqarı Şurası Tışqı işler komitetiniñ başlığı Ganna Gopko, başqa halq deputatları, merkeziy akimiyet organlarnıñ vekilleri, diplomatlar, alimler, jurnalistler, uquq qorçalayıcılar ve cemaat erbabları iştirak etti.

Tedbirde, ukrain vatandaşlarına memuriy hızmetleriniñ berilüvinde qolaylaştırmadan başlap yarımada ile qanunsız iqtisadiy munasebetlerge qarşılıq kösterüvge ve ekologik telükelerni kerekli derecede temin etüvge qadar, Qırımnıñ ilhaqı ile bağlı olğan Ukrainanıñ içki meselelerniñ çezilüvine ameliy yanaşma muzakere etildi.

İrına Geraşçenko tedbir pek aktual olğanını qayd etti ve vaqtınca işğal etilgen yarımada bügün aqsızlıq meydanı ve insan aqları muntazam şekilde bozulğan yer olğanını hatırlattı. ‘‘Qızıl Haç Halqara Komitetiniñ missiyası dört yıl devamında ne de işğal etilgen Donbastaki reinelerni, ne de ilhaq etilgen Qırımdaki siyasiy mabuslarnı ziyaret etemey’’, – dep qayd etti İrına Geraşçenko. ‘‘Vaqtınca işğal etilgen topraqlarnıñ, em Qırımnıñ, em Donbasnıñ reintegratsiyası meselesi Devletniñ muntazam strategiyası üzerinde qurulmalı ve halqara uquq aletleriniñ işletilüvini, yani RF qarşı halqara mahkemelerde davalarnı ve halqara ortaqlarnıñ Rusiyege qarşı sanktsiyalar meselesinde birdemligini  köz ögüne almalıdır’’, – dep yekün çekti İrına Geraşçenko.

Ganna Gopko Ukrainanıñ egemenliginiñ ğayrıdan tiklenmesini temsil etken Qırımnıñ işğalden etilüvi eñ muim mesele olğanını qayd etti. Bundan ğayrı, Ukrainağa qarşı silâlı istilâ içün RF-nıñ halqara-uquqiy mesüliyeti de pek muim meselege çevirile. Ukraina Yuqarı Şurası tışqı işler Komitetiniñ başlığı Komitet tarafından al-azırda devlet seviyede RF ile imzalanğan bütün añlaşmalarnıñ teşkerilüvi ve siyasiy mabuslarnıñ qorantalarına yardım berüvniñ teşkil etilüvi boyunca faal iş alıp barılğanı aqqında bildirdi. ‘‘Bundan ğayrı, biz norman format şekilinde halqara meydançığınıñ teşkil etilüvini qırımtatarlarnıñ temsilcileri ile daima beraber muzakere etemiz’’, – dep qayd etti Ganna Gopko.

Borıs Babin Qırımda yaşağan Ukraina vatandaşlarına memuriy hızmetlerni berüv saasında alıp barılğan işni tarif etti, Herson vilâyetinde ‘‘Dokument’’ devlet müessisesi 2018 senesi qural ay 30 kününden başlap keñişletilgen binada faaliyetini başlaycağını bildirdi ve parlamentniñ azaları ile Temsilcilik beraberlikte qırımlılarğa semereli yardım berüv mehanizmlerniñ, bu cümleden, Ukrainanıñ vaqtınca işğal etilgen Qırımda yaşağan Ukraina vatandaşlarına vatandaşlıq vaziyetini resmiyleştirüv ve bedava ekinci nevbet yardımnı berüv saasında işbirligini tarif etti . Bundan ğayrı, Daimiy Temsilci Qırımda himiya işhanelerniñ faaliyeti ve Qara deñiz rafında işğalcilerge boysunğan teşkilâtlar tarafından qanunsız şekilde qum ile gidrokarbonnı istisal etilüv, işğalçi devlet tarafından Azaq deñiziniñ ve Keriç boğazını arbiyleştirilüvi meselelerni köterdi.

Daimiy Temsici toplaşuvda bulunğanlarğa yüksek seviyede iş gruppasınıñ ilk yaz ayındaki oturışında muzakere etilecek Ukrainanıñ vaqtınca işğal etilgen Qırım toprağından istilânıñ devam etmesine qarşılıq kösterüvi, Qırımda Ukraina devletiniñ, uquqiy şahıslarınıñ ve vatandaşlarınıñ aq-uquqlarınıñ qorçalavı boyunca 2018-2019 seneleri içün acele areket Plan aqqında haber etti.

İzet Gdanov vaqtınca işğal etilgen Qırım ile qomşu olğan topraqlarnı, ilk nevbette, Herson vilâyetindeki Geniçesk rayonını lâyıq seviyede qanuniyet ve devlet idaresinen acele sürette temin etmek kerek olğanını qayd etti. Daimiy Temsilciniñ Birinci muavini Qırımğa ve Qırımdan qanunsız avtomobil taşımalar, mal ve hızmetlerniñ ihracatı ve italâtınen bağlı bir sıra pıtraqlı meselelerni çezmek ve Qırımğa qanunsız taşımalarnen oğraşqan avia şirketlerini, deñiz gemiciligi teşkilâtlarnı, demiryol naqliyatı müessiselerni kompleks şekilde uquqiy cietten semereli taqip etilüv mehanizmni yürsetmek lâzim degen fikirni bildirdi.

2018 senesi qural ay (mayıs) 25 künü Borıs Babin Açıq kafedranı faaliyetiniñ devamı olaraq Ukraina Diplomatiya Akademiyasında merkeziy akimiyet organlarnıñ vekilleri, diplomatlar, alimler, jurnalistler, uquq qorçalayıcılar ve cemaat erbabları içün ‘‘Halqara teşkilâtlarnıñ Ukrainada bölükleri ve Qırım meselesi’’ mevzusında açıq lektsiyanı keçirdi.