2018 senesi ekim (oktâbr) ayı 28 künü «Almenda» cemaat maarifçiligi merkezi ‘‘Ukrinform’’ binasında ‘‘Qırım içün tasil’’ haber-analitik maruzasını taqdim etti.
İşbu tedbirde Ukraina Prezidentiniñ Qırım MC Temsilciliginden uquqiy talil hızmetiniñ baş mesleatçısı Ruslan Seydametov iştirak etti.
Maruzanı taqdim etüv esnasında «Almenda» cemaat maarifçiligi merkeziniñ yolbaşçısı Valentina Potapova işğal etilgen Qırımda yaşağan abituriyentlerniñ qararlarına RF işğalci akimiyetiniñ propagandası ve basqısı ile bağlı olğan bir qaç faktor tesir etkenini bildirldi. ‘‘Qırımlı mezunlarnıñ qararlarına tesir etken faktorlarnıñ üç çeşitini beligiledik. Birincisi – propaganda ve basqı. Keriç faciası misalinde kütleviy arbiyleştirüv yarımadanı nege ketirgenini epiñiz kördiñiz. ‘‘Duşmanlıq tili’’ ve ‘‘Yarovaya qanunları’’ da tesir etmekte. Bu qanunlar, ‘‘yasaq etilgen mevzular’’ ile bağlı olğan edibiyatnı darqatuv içün 14 yaşından başlap mesüliyet belgiley. Ve böyle mevzularnıñ bir qısımı 11-nci sınıf içün Ukraina tarihi dersliginde bile bulunmaqta. Yani, işbu derslikniñ talebede bulunması içün onı cinaiy mesüliyetke çeke bileler. Bundan da ğayrı, balalar ukrain aliy oquv yurtlarına kirmek niyetlerini öz sınıfdaşlarından bile gizlemege mecburlar’’, – dep qayd etti o.
Tedbirde Çehiya Cumhuriyetiniñ Ukrainadaki Elçihanesiniñ siyasiy meseleler boyunca mesleatçısı Lutsiye Ganzliçkova, vaqtınca işğal etilgen topraqlar boyunca Ukraina Nazirliginde Qırım MC ve Aqyar şeeri boyunca idaresiniñ işğal etilgen topraqlarda yaşağan vatandaşlar ile alâqalar bölüginiñ müdiri Lüdmila Şçekun, jurnalistler, cemaat teşkilâtlarınıñ vekilleri iştirak etti.