Temsilcilikniñ 2018 senesi qara qış ayı (yanvar) 24-te imzalanğan mektübine binayen keçirilgen muşaverelerniñ neticesinde, Ukraina baytar tıbbiyeti boyunca baş devlet müfettişiniñ 2018 senesi saban ayı (mart) 28 künü imzalanğan №31 avalesi ile Ukraina baytar tıbbiyeti boyunca baş devlet müfettişiniñ vaqtınca işğal etilgen Qırım ile memuriy sıñırdan ayvanlarnı keçirmege yasaq etken 2014 senesi ekim ayı 10-da imzalağan №129 avalesine deñişmeler kirsetildi.

Ameldeki avaleniñ 1.1 maddesi boyunca Ukrainanıñ vaqtınca işğal etilgen topraqlarında yaşağan ya da vaqtınca bulunğan Ukraina vatandaşları ev ayvanlarını baytar-sanitar pasportları esasında sıñırdan keçire bileler.

2018 senesi qural ay (mayıs) 3 künü Temsilcilikte devlet sıñırında ve naqliyatta Devlet baytar-sanitar nezareti boyunca Odessa regional hızmeti ile qanuniyetniñ yañı qaideleriniñ amelge keçirilüvine bağışlanğan iş körüşüvi keçirildi. Hızmetniñ vekilleri qayd etkenlerine köre, avalede añılğan baytar-sanitar pasportlar Ukrainanıñ ya da başqa devletlerniñ vekâletli müessiseleri tarafından berilip, Ukraina qanuniyetine ve halqara añlaşmalarğa riayet etmeli. İşğalci akimiyetke boysunğan müessiseler tarafından berilgen qanunsız baytarlıq vesiqaları ayvanlarnıñ KÇNN-dan keçirilüvine ruhset bermey.