2018 senesi boş ay (noyabr) 15 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikteki halqara alâqalar hızmetiniñ hadimleri ‘‘Qırım ile sıñırda nezaret noqtalarını abadanlaştıruv – devlet öz vazifesini yerine ketirirmi?’’ mevzusında matbuat brifinginde iştirak ettiler.
Tedbirde ‘‘Qırım SOS’’ cemaat birliginiñ idare başlığı Tamila Taşeva, insan aqları boyunca Ukraina-Helsinki birligi qırım qabulhanesiniñ abulqatı Aleksandr Sedov, Qırım aq-uquq qorçalav gruppasınıñ talilcisi Olga Kurişko, ‘‘Qırım SOS’’ cemaat birliginiñ adliyecisi, Ukraina infraterkip Nazirliginiñ devlet siyasetini strategik planlaştıruv ve koordinatsion Müdirliginiñ baş müdiri, cemaat, matbuat vastalarınıñ vekilleri iştirak etti.
Tedbir esnasında ‘‘Çonğar’’ ve ‘‘Qalançaq’’ KÇNN abadanlaştırıluvı ve olarnıñ yanında hızmet zonalarnıñ teşkil etilüvi ile bağlı olğan meseleler muzakere etildi, Ukraina Nazirler Şurası mütenasip maliyeni ayıruv aqqında 2018 senesi (oraq) iyül ayı 4 künü 584 sanlı qararnı qabul etken soñ Ükümet tarafından yapılğan areketler talil etildi.
Tedbir esnasında Borıs Babin yuqarıda qayd etilgen KÇNN-nıñ abadanlaştırıluvı ile bağli olup, vatandaşlar içün eñ minimal seviyede bile mütenasip şartlarnıñ yaratılmamasına ketirgen meselelerni (piyade yolaqlarında aydınlatuv ve mütenasip yol töşemesiniñ, küneş ve tınmalardan qorçalağan saçaqlarnıñ, qış mevsiminde qızınuv noqtalarınıñ, KÇNN infraterkip obyektlerini baqım zonalarınıñ ve gece-kündüz tıbbiy yardım hızmetiniñ, KÇNN-nı donatuv boyunca tasdıqlanğan leyhalarnıñ yoqluğını) qayd etti.
Bundan da ğayrı, Daimiy Temsilci vaqtınca işğal etilgen topraqlarda yaşamağa devam etken, ya da qıtağa köçken vatandaşlarınıñ pasport resmiyleştirüvnen bağlı problemaları olğanını, Qırımnıñ civarındaki rayonlarda Memuriy hızmet merkezleri kerekli miqdarda olmağanını tasdıqladı. Daimiy Temsilci vaqtınca işğal etilgen Qırımda yaşağan Ukraina vatandaşları içün memuriy hızmet tertibiniñ mükemmelleştirilüvi, Novooleksiyivka qasabasında Memuriy hızmet merkeziniñ açıluvı boyunca kerekli adımlar yapılğanını qayd etti, 2018 senesi boş ay 16 künü Novotroyitske qasabasında yañı Memuriy hızmet merkezi açılacağı aqqında bildirdi.
Tedbirde KÇNN-nıñ yanında Memuriy hızmet merkezlerini teşkil etüvnen bağlı havfsızlıq telükeleri boyunca Temsilcilikniñ ve başqa vekâletli organlarınıñ mevamı bildirildi. Bundan da ğayrı, KÇNN-nıñ yaqınlığında bank ve poçta bölükleriniñ, 4G alâqasınıñ mevcüdiyeti muzakere etildi. Ayrıca KÇNN-dan meftalar ile tabutlarnı ve kül ile urnalarnı keçirüvnen bağlı meselelerge cemaatnıñ diqqatını celp etmege kerek olğanı qayd ettiler.