2018 senesi ilk yaz (iyün) 15 künü Ukraina Milliy politsiyasınıñ başlığı Sergiy Knâzev Herson vilâyetiniñ Qalançaq rayonında ‘‘Qalançaq’’ KÇNN yanında yerleşken Qırım MC ve Aqyar şeeri boyunca Milliy politsiyanıñ yañı ‘‘Sivaş’’ noqtasını nezaret etti.

Bölükniñ hadimleri ögünde çıqışta bulunır eken, Sergiy Knâzev şunı qayd etti: ‘‘Sizden neni isteymiz? Ukrainanıñ işğal etilgen topraqlarından Ukrainanıñ serbest qısımına memuriy sıñırdan keçken adamlar, ukrainalılar sizge kelip, anda neler yahşı ya da yaramay olğanını, olarnıñ vatandaş aqları nasıl bozulğanını ikâye etmelerini isteymiz, siz ise bunı diqqatnen ve tavsilâtlıca yazmalısıñız’’.

Ukraina Prezidentiniñ Qırım MC Daimiy Temsilcisi Borıs Babin tantanalı toplaşuvda Ukraina Milliy politsiyanıñ reberiyetine Qırım meseleleri boyunca Ukraina Prezidentiniñ avalelerini yerine ketirmek maqsadınen Milliy politsiyanıñ Qırım boyunca Baş idaresini Qırım ile qomşu olğan Herson vilâyetine acele surette köçürgeni içün öz minnetdarlığını bildirdi.

Borıs Babin devriye politsiyası hadimlerine Qırım meselelerinen oğraşqan uquq qorçalav organlarnı Qırımnıñ civarlarında yerleştirmek içün qolundan kelgenini yapacağını vade etti ve yaqınlarda qabul etilecek ‘‘Ukrainanıñ vaqtınca işğal etilgen Qırım toprağından istilânıñ devam etmesine qarşılıq kösterüv, Qırımda Ukraina devletiniñ, uquqiy şahıslarınıñ ve vatandaşlarınıñ aq-uquqlarını qorçalav boyunca 2018-2019 seneleri içün acele areket Planına’’ Ukraina İçki işler nazirliginiñ mütenasip teklifleri tolusınen kirsetilgenini bildirdi.