Qırım Muhtar Cumhuriyetiniñ ve Aqyar şeeriniñ işğal etilüvine qarşılıq kösterüv Kününe bağışlanğan marafonnıñ üçünci panel munaqaşası esnasında qonuşmacılar vaqtınca işğal etilgen Qırım Muntar Cumhuriyeti ve Aqyar şeeri topraqlarında yaşağan insanlarnı
ğayrıdan integratsiya etüvge dair fikirlerinen paylaştılar.
Ukraina Prezidentiniñ Qırım MC-deki Daimiy Temsilcisiniñ muavini Tamila Taşeva ”vaqtınca işğal etilgen topraqlarda yaşağan Ukraina vatandaşlarınen bağ tutmaq, olarnı Ukraina ükümetiniñ nezareti altında bulunğan topraqlarda keçeyatqan ceryanlarğa mümkün olğanı qadar celp etmek”; vaqtınca işğal etilgen topraqlarda yaşağan vatandaşlarnıñ bütün mevcüt olğan devlet hızmetlerine, şu cümleden tıbbiy, tasil, memuriy hızmetlerge uzaqtan semereli şekilde irişime bilmelerini temin etmek” müim olğanını qayd etti.
Vaqtınca işğal etilgen topraqlarnı ğayrıdan integratsiya etüv meseleleri boyunca Ukraina naziriniñ muavini İnna Dragançuknıñ fikirince, ”Bir-de-bir informatsion siyaset muayyen areketlerge esaslanmalı. Nazirlik tasil, medeniy ve tıbbiy saalarda öz vekâletlerini yerine ketire, vaqtınca işğal etilgen topraqlarda yaşağan Ukraina vatandaşlarınıñ devlet hızmetlerinen tolu şekilde faydalana bilmeleri içün bazı areketler yapıldı”.
”QırımSOS” cemaat birliginiñ ortaq teşkilâtçısı Olga Kurışkonıñ aytqanlarına köre, ”işğalniñ 7 yılı içinde Rusiye Federatsiyası bütünley tasil programmalarnı deñiştirdi. Onıñ içün hususan Qırım MC-de yaşağan abituriyetlerni maksimal derecede ukrain tilini, edebiyatnı, Ukraina tarihını ögrenüvge celp etip, olarnıñ Ukraina topraqlarındaki oquv yurtlarına kirmeleri ve ukrain tilide oquy bilmeleri içün imkâniyetlerniñ yaratılması ögümizde turğan vazifelerniñ arasında bulunmaqtadır”.
Ukraina dijital deñişüvler Nazirligindeki Avropağa integratsiya etüv Müdürliginiñ müdiri Gulsana Mamediyeva: Vatandaşlarımızğa çeşit türlü hızmetlerni uzaqtan bere bilmemiz içün uzaqtan şahısnıñ kimligini tasdıqlav meselesini çezmelimiz. Ukrainadaki dijital hızmetlerniñ umumiy dijitalleştirüv yoruğında bu saanıñ inkişaf etilmesi bizim içün pek müimdir”.
Ukraina medeniyet ve haber siyaseti naziriniñ muavini Taras Şevçenko: ”İnformatsıon havsızlıq strategiyası, onıñ esas vazifesi ve yalancı haberlerge muntazam şekilde qarşılıq kösterüv – media saasında oqumışlıqnı arttıruv, keyfiyetli devlet alâqa vastaları ve işğal etilgen topraqlarda ukrain yayıncılardan haber almaq fırsatları.
Bundan ğayrı, daa bir müim neticemiz, qırımtatar tilini uzaqtan ögrenüv içün platformanıñ yaratıluvı, endiden başlap, oña aves etken er kes qoşula bile”.