2014 senesi saban ayınıñ 18-de Aqmescitte ücüm etüv neticesinde Ukraina Silâlı Quvetleriniñ 13-nci fotogrametrik merkezi zapt etilde. Ukrain arbiy bölügine ücüm etüv esasında rus mergin nişancısı ukrain zabiti Sergiy Korkurinni öldürdi ve daa bir zabitni yaraladı. O, Rusiye işğalcileri tarafından öldürilgen ilk Ukraina arbisi edi, Putin ise defalarca ”tınç qoşuluv” aqqında halq ögünde aytqan edi. Amma qarşılıq kösterüv o zaman bar edi ve şimdi devam ete.
Aynı vaqıtta Kremlde sözde ”Qırım Cumhuriyetini Rusiye Federatsiyasınıñ terkibine qabul etüv aqqında añlaşma” imzalandı. Añlaşmanıñ imzalanması Qırımda 2014 senesi saban ayınıñ 16-da keçirilgen sözde ”referendumge” esaslana edi.
Ukraina Esas qanunını bozğan referendum Ukraina akimiyeti tarafından tanılmadı, çünki Ukraina topraqları yalıñız bütün ukrain referendumı vastasınen deñiştirile bile.
Qırım Muhtar Cumhuriyetiniñ taqdirini belgilegen ”referendum” işğal şaraitlerinde keçirildi, onı BM teşkilâtı, Mustaqil Devletler Birligi, AB ve AŞPA resmiy nezaretçileri nezaret etmediler. Bu sebepten BM teşkilâtı aza devletleriniñ ekseriyeti ve başqa halqara teşkilâtlar Ukraina Esas qanunını ve halqara uquq subyektleriniñ topraq bütünligi ve egemenligine dair esas halqara uquq şartnarını bozğan Qırım ”referendumını” qanunsız olaraq tanıdı.
Aynı şu künü ”imzalayıcılarnıñ” episine – dağıtılğan Qırım Yuqarı şurasınıñ spikeri Volodımır Konstantınov, baş nazir Sergiy Aksönov ve Aqyarda Rusiye işğalcilerini temsil etken Oleksiy Çalıyğa qarşı Ukraina Havfsızlıq Hızmeti tarafından kriminal davalar açıldı, bundan ğayrı, Rusiye tarafından qanunsız Qırım Cumhuriyetiniñ tanılmasına ve añlaşmanıñ imzalanmasına dair Rusiye Federatsiyasınıñ Ukrainadaki meseleleri boyunca Vaqtınca vekâletlisine narazlıq bildirildi.
O vaqıttan berli vaqtınca işğal etilgen Qırım Muhtar Cumhuriyeti ve Aqyar şeeri topraqlarında Ukraina vatandaşlarına zorbalıqnen RF pasportları berilmege başladı.
Halqara cemiyet em referendumnı, em de onıñ ”adliy” şekilde qoşuluv aqqında añlaşmada pekitilmesini ve Qırım topraqlarınıñ Rusiye Federatsiyası tarafından vaqtınca işğal etilmesini tanımadı. Şahsiy ve iqtisadiy sanktsiyalar amelge keçirildi.
Fotosüret: Maksım Koşelev.