Em Herson vilayetiniñ, em de vaqtınca işğal etilgen Qırımnıñ sakinleri biometrik pasportlarnı resmiyleştirüv hızmetlerine köstergen büyük aveslikke cevap olaraq, Ukraina Devlet migratsiya hızmeti Ukraina Prezidentiniñ Qırım MC Temsilciligi ile beraberlikte yapqan areketlerniñ neticesinde, ‘‘Dokument’’ Devlet müessisesiniñ Herson şeerinde vatandaşlarğa hızmet etken ‘‘Pasport servisi’’ 2018 senesi qural ay (mayıs) 30 kününden başlap, (Boris Mozolevskiy soqağı tarafından) Uşakov caddesi, 53 adresi boyunca yerleşken yañı binada çalışmağa başladı.

‘‘Dokument’’ DM eski binasında biometrik malümatlarnı toplamaq içün tek eki iş stantsiyası çalışa, daa bir danesi azır vesiqalarnı bere edi. Müessiseniñ imkânları pek zayıf olıp, aves etkenlerniñ bütün talaplarına riayet etip olamay edi, bu ise belli bir derecede içtimaiy kerginlikni doğura ve vatandaşlarnı Temsilcilikke şikâyet ettire edi. Al-azırda müşteriler içün malümatlarnı toplağan 15 iş stantsiyası ve azır vesiqalarnı bergen 4 stantsiya çalışacaqtır. Er kün 400 qadar şahısqa hızmetlerni bermege planlaştırıla (evelki binada – 100-120 şahıs), elektron nevbet çalışmaqta, qoşma olaraq onlayn-nevbetke yazılmağa da mümkün olacaqtır. Bundan da ğayrı, tıbbiy sigorta, vesiqalarnıñ apostili, makümiyet olıp-olmağanı hususında malümat kâğıdı kibi qoşma hızmetlerni de sımarlamağa mümkündir. Hızmetler içün ‘‘Pasport servisi’’ binasında yerleştirilgen terminallarda naqit para ya da bank kartları vastasınen tölemege mümkün. Merkezde bedava Wİ-Fİ ve ana-babalar vesiqalarnı resmiyleştirgen arada balarını eglendirmek içün oyun meydançığı çalışa.

Uşakov caddesi, 53 adresi boyunca yerleşip, vatandaşlarğa hızmet etken Herson merkezi iş künlerinde saat 9:00 ve 20:00 arasında, cumaertesi künlerinde saat 9:00 ve 18:00 arasında üyle teneffüsine qapatılmayıp çalışacaq, bazar künlerinde ise qapalı olacaqtır. Temsilcilik emindir, ‘‘Dokument’’ DM-niñ yüksek ihtisaslı hadimleri vaqtınca işğal etilgen topraqlardan kelgen Ukraina vatandaşlarına avropa seviyede oñaytlı ve keyfiyetli hızmetlerni taqdim etecek.