Ceryannıñ başlatılması aqqındaki ilân ”Prozorro” platformasında derc etildi, ceryan ”Halq ögünde satın aluvlar” Ukraina qanunına binaen keçirilecektir. Tender vaqtınca işğal etilgen Qırımda, Aqyar şeerinde ve qomşu topraqlarda yaşağan şahıslarnıñ medeniy ve informatsion ihtiyaclarına cevap bermek maqsadınen keçirile.

Tender teklifleri 2021 senesi qural aynıñ 8-nece qabul etilecektir. Mezat 2021 senesi qural aynıñ 11-de başlanacaq. İlân etilgen fiyatı – (mezat esnasında eksile bilecek) 4 mln grivnâ.

Vaqtınca işğal etilgen Ukraina topraqlarını ğayrıdan integratsiya etüv meseleleri boyunca Baş nazir muavini Oleksiy Reznikov haber etti ki, ”Bugün biz RF tarafından vaqtınca işğal etilgen Ukraina topraqlarına, yani Qırım MC ve Aqyar şeerine yayınlaycaq televizion ve radio şirketleri içün birinci olıp, aynı vaqıtta soñki olmağan tender ceryanını başladıq. Fursattan faydalanıp, cümlesini davet etmege isteyim”.

”Al-azırda em Qırım yarımadasına, em de işğal etilgen Donetsk ve Lugansk topraqlarına yayınlavlar etilmesine qol tutmaq içün 50 mln grn ayırıldı, nazirlik olarnı yalıñız açıq mezat yolunen yayınlayıcılarğa masraf etecektir. Er kes bunıñ yeterli olmağanını añlay. Bu sebepten 2021 senesi içün bücetke soñki sefer deñişüvler kirsetilgende, men halq deputatlarına muracaat etip, işğal etilgen topraqlarğa yayınlavlar içün ayırılğan maliyeviy destekni 100 mln grivnâğace arttırmağa rica ettim. Al-azırnda sıñırda bulunğanlarnı ğayıp etmemek içün bunı yapmaq kerekmiz”, – dep qayd etti Baş nazir muavini.