2021 senesi ilk yaz ayınıñ 23-de Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç Islamabad Institute of Conflicts Resolution (IICR) tarafından Ukraina çetel işler Nazirligi, Ukraina Prezidentiniñ Qırım Muhtar Cumhuriyetindeki Temsilciligi ve Ukrainanıñ Pakistandaki Elçihanesi ile beraberlikte teşkil etilgen ”Qırım Ukrainadır” halqara onlayn konferentsiyada iştirak etti.

Tedbirde Ukraina çetel işler Naziriniñ Birinci muavini Emine Caparova, Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç, Ukrainanıñ Pakistan Cumhuriyetindeki Fevqulâde ve Vekâletli Elçisi Markiyan Çuçuk, ”Qırım birdemligi” Qırım aq qorçalayıcı teşkilâtınıñ temsilcisi, aq qorçalayıcı Lütfiye Zudiyeva çıqışta bulundılar.

Vaqtınca işğal etilgen Qırım Muhtar Cumhuriyeti ve Aqyar şeeri topraqlarını işğalden azat etüv ve ğayrıdan integratsiya etüv strategiyasını taqdim etken Anton Korınevıç tedbirde bulunğanlarnı vaqtınca işğal etilgen Qırımnı işğalden azat etüv ve ğayrıdan integratsiya etüv yönelişinde devletimiz tarafından yapılğan bir sıra adımlarnen tanıştırdı, şu cümleden bu kibi müim strategik vesiqanıñ amelge keçirilüvinden beklenilgen neticelerni tarif etti.

”Qırım aqqında Pakistan kibi esas regional liderlernen laf etmemiz müimdir. Bugün Qırım platformasınıñ ğayesini ve Vaqtınca işğal etilgen Qırım Muhtar Cumhuriyeti ve Aqyar şeeri topraqlarını işğalden azat etüv ve ğayrıdan integratsiya etüv strategiyasınıñ esas hususiyetlerini ekspertler müitine taqdim ettimiz. Bundan ğayrı, vaqtınca işğal etilgen Qırım Muhtar Cumhuriyeti ve Aqyar şeeri topraqlarını işğalden azat etüv ve ğayrıdan integratsiya etüvge dair devlet siyasetiniñ 2021 senesi devamında ilk nevbetteki vazifelerini muzakere ettik. Qırım mevzusı halqara cemiyetiniñ kün tertibinde bulunmalı”, – dep qayd etti çıqışında Anton Korınevıç.

Emine Caparova ecnebiy diñleyicilerge ”Qırım platforması” teşebbüsini taqdim etti ve vaqtınca işğal etilgen Qırım toprağındaki vaziyetnen tanıştırdı, artqan arbiyleştirüv ve halqara gumanitar uquq şartları qaba şekilde bozulğanı aqqında haber etti.

Lütfiye Zudiyeva işğal etilgen Qırımda insan aqları kütleviy şekilde bozulğanı, şu cümleden RF işğalci akimiyeti tarafından qırımtatarlar qanunsız şekilde yaqalanğanı, apis etilgeni ve taqip etilgeni aqqında ikâye etti.