2018 senesi ekim (oktâbr) ayı 17 künü Ukraina Prezidentiniñ Qırım MC Daimiy Temsilcisi Borıs Babin Milliy avacılıq universiteti Halqara alâqalar ilmiy-oquv institutınıñ studentleri içün istilâcı devlet tarafından vaqtınca işğal etilgen Qırımda halqara avacılıq uquqnıñ bozuluvı boyunca açıq lektsiya oqudı.

Daimiy Temsilci Temsilcilikniñ vekâletini ve kündelik faaliyetini tarif etti, yarımadada şimdiki vaizyetni talil etti, ava naqliyatı meseleleri boyunca ameldeki esas normativ-uquqiy senetlerni ve halqara vesiqalarnı qayd etti.

Borıs Babin Qırımdaki işğalci akimiyetniñ grajdan avacılıq saasında faaliyetini talil etti, Qırımğa qanunsız taşımalarnen oğraşqan rusiye ava şirketleriniñ qanunsız areketlerini toqtata bilecek semereli vastalarnı studentlernen muzakere etti, halqara uquqnı bozğanı içün RK-na qarşı qabul etilgen sanktsiyalarnı amelde işletüv mehanizmlerni aydınlattı. Daimiy Temsilci ava naqliyatı saasında ameldeki qanuniyetni bozuv içün mesüliyetke çekilgenlerniñ misallerini ketirdi. ‘‘Mehanik Pogodin’’ rusiye tankerni qamaçavğa aluvnıñ misalinde ‘‘Sanktsiyalar aqqında’’ Ukraina qanunınıñ maddelerini tarif etti. Grajdan avacılıq saasında kadro meselelerine ayrıca diqqat etti.