2019 senesi qural ay (mayıs) 30 künü Ukraina buhran media merkezinde ”Qırımda saban (mart) ayındaki kütleviy tevqifler: yaqalanğanlarnıñ bügünki alları ve olar nasıl yardımğa muhtaclar” mevzusında matbuat konferentsiyası olıp keçti, tedbirde Qırımtatar Milliy Meclisiniñ reisi, Ukraina halq deputatı Refat Çubarov, qırımlı siyasiy mabuslarnıñ qoranta azaları ve abulqatları iştirak etti.

Tedbir iştirakçileri vaqtınca işğal etilgen Qırımda saban ayında Rusiye mahsus hizmetleri qırımtatarlarnı kütleviy şekilde yaqalağanı ve olarnıñ evlerinde tintüvler keçirgeni, yarımada işğal etilgenden berli Rusiye akimiyeti ukrain muhtariyetiniñ tamır halqını qorqutqanı, qıynağanı, ruhiy ceetten ezgeni ve başqa şekilde cezalağanı aqqında tarif ettiler.

Refat Çubarov öz çıqışında Rusiye muntazam şekilde basqı yapıp, adamlarnı ruhtan tüşürmek ve neticede tamır Qırım halqına öz evlerini terk ettirmek istegenine diqqat celp etti.

Bundan da ğayrı, Qırımtatar Milliy Meclisiniñ reisi Qırım ealisine qarşı yapılğan cezalavlarnı yalıñız yarımadanı işğalden azat etip toqtatmaq mümkün olğanını qayd etti.

Tedbir vaqıtında işğalci akimiyet bügün Qırım birdemliginiñ eki faalci Lütfiye Zudiyeva ile Mumine Saliyevanı yaqalağanı aqqında belli oldı.