Bügün Qırımda RF işğalci akimiyetniñ cezalav küçleri sabadan ‘‘Qırım birdemligi’’ teşkilâtınıñ yöneticisi ve faalcisi olğan Server Mustafayevniñ ve Edem Smailovnıñ evlerinde tintüvler keçirdiler. Yuqarıda qayd etilgen cezalav tedbirler faalcilerniñ aktiv vatandaşlıq ve uquq qorçalayıcı areketleri içün, yarımadada etnik ayırımcılıqqa, zorbalıqqa, qırımtatar halqnıñ eziyetlenmesine qarşılıq köstergenleri içün muntazam şekilde yapılmaqta.

Bügün rusiye mahsus quvetlerniñ esas maqsadı – bir de bir içtimaiy faaliyetlerni boğuv, cezalav küçlerniñ qırım cemiyetine yapqan tecavüzini doğru aydınlatılmasına yol bermemektir . ‘‘Qırım birdemligi’’ doğru qayd etkenine köre, cemaat faalcilerniñ, jurnalistlerniñ ve qorçalayıcılarnıñ evelki esassız apis etilüvi rusiye silâlı quvetlerniñ yarımadada yapqan areketleri qanunsız olğanını bir kere daa tasdıqlay. Çünki bügünde bügün Qırımda faal vatandaşlıq pozitisyası olıp, öz fikirlerini açıq-aydın beyan etken er bir insan rusiye uquq qorçalav organlarınıñ basqı, taqip etüv, qorqutuv, tintüv ve apis etüv kibi cezalavlarına oğray bile.
‘‘Qırım birdemligi’’ bütün mustaqil matbuat vastalarnı ve uquq qorçalayıcı teşkilâtlarnı qırımtatar halqına qarşı yapılğan basqı adiselerni aydınlatmaq içün haber ve uquq saalarında bütün itibarlarını işletmege ve Rusiyeni qanunsız şekilde yaqalanğan Server Mustafayev ve Edem Smailovnıñ aqlarına riayet ettirmek içün mümkün olğan bütün usullarnı qullanmağa çaqırdı.