2018 senesi arman (avgust) ayı 3 künü Tavriya milliy universitetiniñ rektorı vazıfesini vaqtınca becergen Volodımır Kazarin, Temsilcilikteki halqara alâqalar hızmetiniñ reisi Yevgen Samuha ve uquqiy talil hızmetiniñ baş mesleatçısı Ruslan Seydametov, İnsan aqları boyunca Avropa mahkemesiniñ meseleleri boyunca Vekâletlisi İvan Lişçına ile körüştiler.

Körüşüvde işğal etilgen Qırımda Rusiyeniñ istilâsı sebebinden öz mülkiyetini ve tasil faaliyetini devam ettirmek imkânlarından marum qalğan ukrain aliy oquv yurtlarınıñ RF tarafından bozulğan menfaatları ve ketirilgen zararlarnıñ tazminatı ile bağlı bir sıra meseleler muzakere etildi.

Volodımır Kazarin, işğalcilerni istilâiy areketleri ve ukrain universitetleriniñ işğal etilgen Qırımda qalğan mülkiyetiniñ qanunsız alda basıp alğanı içün halqara-uquqiy mesüliyetke çekmege kerek olğanını qayd etti.

Körüşüv esnasında Ukrainanıñ vaqtınca işğal etilgen Qırım toprağından istilânıñ devam etmesine qarşılıq kösterüv boyunca 2018-2019 seneleri içün acele areket Planınıñ yerine ketirilüvinen bağlı umumiy tedbirler, bu cümleden, İnsan aqları boyunca Avropa mahkemesine Ukrainadan RF-na qarşı açılacaq davalar içün isbatlar bazasını terip etüv planı ve onı akimiyet organları arasında uyğunlaştıruv muzakere etildi.