2018 senesi ekim (oktâbr) ayı 23 künü Ukraina Prezidentiniñ Qırım MC Daimiy Temsilcisi Borıs Babin, vaqtınca işğal etilgen Qırım toprağından istilânıñ devam etmesine qarşılıq kösterüv, Qırımda Ukraina devletiniñ, uquqiy şahıslarınıñ ve vatandaşlarınıñ aq-uquqlarını qorçalav boyunca 2018-2019 seneleri içün acele tedbirler Planınıñ 13.8 maddesindeki vazifeni yerine ketirerek, Qırımdaki medeniy ve tarihiy asabalığınıñ qorçalavına işğalci akimiyetniñ menfiy tesirine qarşılıq kösterüv, mütenasip uquqiy ve teşkiliy cevap berüvniñ algoritmleri boyunca muşavere keçirdi.

Muşaverede Ukraina medeniyet Nazirliginiñ, adliye Nazirliginiñ, iqtisadiy inkişaf ve ticaret Nazirliginiñ, Ukraina Milliy İlimler Akademiyası atiqiyat İnstitutınıñ, Ukraina Havfsızlıq Hızmeti Qırım MC Baş idaresiniñ, Ukraina Milliy Polisniñ, aliy oquv yurtlarınıñ vekilleri iştirak etti.

Muşavereniñ iştirakçileri işğal etilgen Qırımda medeniy ve tarihiy abidelerniñ bozuluvına, qanunsız arheologik qazmalarğa ve medeniy asabalıqnıñ Qırımdan Rusiye Federatsiyasına çıqarıluvına qarşılıq kösterüv meselesini muzakere ettiler. Tarflar Qırım MC ve Aqyar şeerinde UNESCO komissiyası tarafından nezaret etüvge qol tutuv tedbirlerni muzakere ettiler. Sanktsion cedvellerini kenişletüv ve içine Ukrainanıñ vaqtınca işğal etilgen Qırım toprağında qanunsız arheologik qazmalarını yapqan ve medeniy asabalığını yarımadadan alıp ketken fizikiy ve uquqiy şahıslarnı kirsetüv meselesi muzakere etildi. Körüşüvniñ neticesi olaraq, ilerideki faaliyet boyunca bir sıra ameliy qararlar qabul etildi.