2018 senesi arman (avgust) ayı 7 künü Temsilcilikniñ Kıyiv şeerindeki ofisinde Ukraina Prezidentiniñ Qırım MC Daimiy Temsilcisi Borıs Babinnıñ yolbaşçılığında Qırımda yaşağan Ukraina milliy azğınlıqlarınıñ ve olarnıñ vekilleriniñ aq-uquqlarını qorçalav boyunca muşavere olıp keçti.

Ukrainanıñ vaqtınca işğal etilgen Qırım toprağından istilânıñ devam etmesine qarşılıq kösterüv, Qırımda Ukraina devletiniñ, uquqiy şahıslarınıñ ve vatandaşlarınıñ aq-uquqlarını qorçalav boyunca 2018-2019 seneleri içün acele tedbirler Planını yerine ketirüv çerçivesinde keçirilgen işbu muşaverede Ukraina Çetel işler Nazirliginiñ, Ukraina Haber siyaseti Nazirliginiñ, Ukraina Medeniyet Nazirliginiñ ve başqa merkeziy akimiyet organlarınıñ vekilleri iştirak etti.

Borıs Babin, Qırımda ananeviy şekilde yaşağan milliy azğınlaqlar vekilleriniñ milliy-medeniy yaşayışını nezaret etilmesi, Ukrainanıñ nezareti altında bulunğan topraqlardaki tedbirlerge bu milliy azğınlıqlarnıñ vekillerini umumiy celp etüv mehanizmniñ teşkil etilmesi muim olğanını qayd etti. Rusiye işğalci akimiyeti Qırımda sahte azeri, bulğar, ermeni, yunan, gürci, eston, yeudi, alman ‘‘milliy-medeniy muhtariyetlerni’’ teşkil etip, olar vastasınen bu ve diger milliy azğınlıqlarnıñ vekillerini ruslaştırmağa, soydaş devletlerge basqı yapmağa ve Qırımdaki vaqialar aqqında yañlış malümatnen halqara teşkilâtlarnı aldatmağa ıntılğanı qayd etildi. Muşavere esnasında mütenasip cemiyetniñ Qırımdaki yaşayışı aqqında doğru malümat almaq maqsadınen, akimiyetniñ ve cemaat teşkilâtlarnıñ vekilleri ile soydaş devletlerden ekspertler tarafından Ukrainanıñ Qırımğa yaqın olğan rayonlarını ziyaret etüv meselesi de köterildi.