Üç sene devamında Qırımda ve Ukrainanıñ nezareti altından vaqtınca çıqqan Donbass topraqlarınıñ qısımında yaşağan abituriyentler qolaylaştırılğan protsedura boyunca, yani Tışqı mustaqil imtianlarını tapşırmadan, ukrain zenaat-tehnikiy ve aliy oquv yurtlarına oqumağa kire bileler. Bu aqta aliy oquv yurtlarınıñ, yerli tasil departamentlerniñ ve cemaat teşkilatlarınıñ iştiragi ile Ukraina tasil ve ilim nazirliginde tasil merkezleri vastasınen kirişke bağışlanıp keçirilgen muşaverede bildirildi.

Qolaylaştırılğan protsedura boyunca ‘‘Qırım-Ukraina’’ tasil merkezleri vastasınen ilk yaz (iyün) ayı 4 kününden başlap berim ayı (sentâbr) 28 kününe qadar oqumağa kirmege mümkündir.

Qolaylaştırılğan protsedura boyunca abituriyent tasil merkezine kelip, ariza yazacaq ve tasil deklaratsiyanı tolduracaqtır. Bundan soñ o eki fenden (ukrain tili, Ukraina tarihi) yekünleyici devlet attestatsiyasından keçecek ve aliy oquv yurtı tarafından belgilengen bir fenden kiriş imtianını ya da icadiy yarışını tapşıracaqtır. Bundan da ğayrı, tasil merkezinen bağlı olğan mektepten vaqtınca malümat kâğıdını alıp, onı 3 ay içinde tasil aqqında devlet şeadetnamesine (attestatqa) deñiştirmege kerektir. Bir sene içinde oñıñ ilâvesini de almağa mümkün olacaqtır. Bu maqsat ile tasil merkezinen bağlı olğan umumtasil oquv yurtnıñ temelinde yıllıq imtianını tapşırmağa kerek.

Tasil aqqında ukrain vesiqaları ve Tışqı mustaqil imtianlarınıñ sertifikatları olmağan şahıslarnen beraber, böyle vesiqalarnı alğan ve Tışqı mustaqil imtianlarını 2016, 2017, ya da 2018 senesi tapşırğan abituriyentlerge de tasil merkezleri vastasınen oquv yurtlarına kirmege mümkündir.

Orta esapnen kiriş ceryanı 3-4 kün devam ete.

Adet üzre, Qırım sakinleri içün kiriş aqqında qoşma malümatlar bergen ‘‘sıcaq ağ’’ çalışacaq.

Qoşma malümat içün umumiy telefon – 0 800 504 425.

‘‘Qırım-Ukraina’’ merkeziniñ Herson şeerinde ‘‘sıcaq ağınıñ’’ telefonı 0 800 50 45 70.

Bütün telefon bağları bedavadır