Arman ayınıñ 9-da Dünya tamır halqları Halqara kününde Kıyiv şeerindeki Şeer bağçasınıñ yazlıq sanasında (”Muşlâ” sanası) Ukraina mustaqilliginiñ 30 yıllığına bağışlanğan ”Bizim 30” leyhası çerçivesinde saat 19:30-da Ukraina tamır halqlarına bağışlanğan tedbir başlanacaq. 

Cemaat avesligi jurnalistika Laboratoriyası, QırımSOS taqımı ve Qırımtatar Milliy Meclisi tarafından teşkil etilgen tedbir çerçivesinde ”Qırımğa öz-özüni qaytaruv” vesiqalı film numayış etilecek, filmniñ müellifleri ve ”Ukraina tamır halqları aqqında” Ukraina qanunınıñ müellifleri ile munaqaşa keçirilecektir.

Film aynı derecede qıyın şartlarda, mesken ve torpaq aqlarından, alğan tasillerine lâyıq iş aqqından marum etilgen, sovet bürokratiyasınıñ şiddetli qarşılıq kösterüvinen qarşılaşıp yañı ayat qurğan farqlı qırımtatar qorantalarınıñ ”öz-özüni qaytaruv” ikâyelerini tarif etmektedir. Olarnıñ çoqusı 2014 senesi Rusiye Qırım yarımadasını qanunsız şekilde işğal etken soñ evlerini ekinci kere ğayıp etti.

Filmniñ qaramanları arasında qırımtatar milliy areketiniñ veteranı Ülviye Ablayeva ve İlver Ametov, rejissör Ahtem Seyitablayev ve memleket içinde avuşqan şahıslardan Erfan Qudusov, Eskender Bucurov, Elmira Kataki, Seyit-Yağya Kazakov, Lerane Haybullayeva bardır. 

Filmniñ müellifleri: Natalâ Gümenük, Anna Tsıgıma.

Filmni numayış etüvden aldın oraq ayınıñ 23-de amelge keçlken ”Ukraina tamır halqları aqqında” Ukraina qanunı mevzusında munaqaşa ötkerilecektir. Ukraina içün onıñ manası nedir? O, Qırımnıñ işğalden azat etilmesine nasıl etip hızmet etecek? Ukraina tamır halqları kimlerdir? Yarımada işğalden azat etilgen soñ qırımtatarlar nasıl şaraitlerge qaytacaqtır? 

Munaqaşa iştirakçileri:

• Mustafa Cemilev – qırımtatar halqınıñ lideri;
• Refat Çubarov – Qırımtatar Milliy Meclisiniñ reisi;
• Natalâ Gümenük – Cemaat avesligi jurnalistika Laboratoriyasınıñ müdiri;
• Tamila Taşeva – Ukraina Prezidentiniñ Qırım Muhtar Cumhuriyetindeki Daimiy Temsilcisiniñ muavini;
• Rustem Umerov – Ukraina halq deputatı;
• Ahtem Seyitablayev – sanat erbabı, rejissör, film qaramanı;
• Lerane Haybullayeva – cemaat erbabı, film qaramanı.

Munaqaşanı ”Ukrainska pravda” matbuat vastasınıñ baş muarriri Sevgil Musayeva idare etecektir.

Tedbir esnasında #PrisonersVoice ve #EvdeBekleymiz leyhalarınıñ mahsus divarı yanında ekseriyetini qırımtatarlar teşkil etken siyasiy mabuslarğa qol tutuv mektüplerini imzalamaq da mümkün olacaqtır. Mektüpler – siyasiy mabuslar içün tışqı dünya ile yekâne bağ vastasıdır. Mektüpler mabuslarnıñ unutılmağanını, olarnıñ azat etilmeleri içün küreşken adamlar bar olğanını hatırlata ve olarğa bu sınavdan keçmek içün küç-quvet bermektedir.

Aves etken er kesni tedbirge davet etemiz.