2018 senesi fevral 6 künü Ukraina Prezidentiniñ Qırım Muhtar Cumhuriyetindeki Daimiy Temsilcisi Boris Babin ve onıñ Birinci muavini İzet Gdanov Qırım yarımadasınıñ qapatılğan ava boşluğında ve ‘‘Simferopol’’ halqara ava limanında Rusiye avia şirketleriniñ qanunsız faaliyetine tesirli qarşılıq kösterüv boyunca iş körüşüvini keçirdiler.
Keñeşte Devlet avia hızmetiniñ, İqtisadiy inkişaf ve ticaret nazirliginiñ, Vaqtınca işğal etilgen territoriyalar ve memleket içinde köçip kelgenler meseleleri boyunca nazirlikniñ, Herson vilâyetinde Baş territorial adliye idaresindeki Devlet icra hızmetiniñ, Qırım MC Savcılığınıñ ve Ukraina havfsızlıq hızmetiniñ Qırım MC ve Aqyar şeeri boyunca baş idaresiniñ vekilleri iştirak etti.
Er teşkilâtnıñ vekili mecliste bulunğanlarğa öz vekâleti çerçivesinde işbu mesele boyunca faaliyetleriniñ neticelerini bildirip, Temsilcilikniñ reberiyeti tarafından qoyulğan suallerge cevap berdi. Muzakere devamında mütenasip qanun bozuluvlarına qarşılıq kösterüv ceetinden ayrı devlet idareleriniñ faaliyetlerindeki nuqsanlıqlar belli oldı.
Bu cümleden, Ukraina devlet avia hızmetiniñ çerçivesinde qanun bozuluvları ale daa keyfiyetli ve muntazam şekilde qayd etilmegeni, Ukraina qanunlarına köre lâyıq sanktsiyalarnı amelge keçirilmesi içün mütenasip materiallar ekseriy allarda öz vaqıtında vekâletli devlet organlarına berilmegeni añlaşıldı.
Bir arada vaqtınca işğal etilgen topraqlarda ve qanuniy halqara ava yollarında çalışqan сinayetçi avia şirketlerniñ uçaqları aqqında Ukraina Tış işler nazirligine kerekli derecede haber etilmey. Muayen fizikiy ve uquqiy şahıslarnıñ cinaiy mesuliyetke çekilme meselesi ale daa çezilmedi.
Keñeşniñ neticesi olaraq, toplaşuv iştirakçilerine yuqarıda qayd etilgen ve başqa nuqsanlıqlarnıñ yoq etilmesi içün mümkün olğanı qadar qısqa vaqıt müddeti berildi, malümat almaşuvınıñ devirleri ve mütenasip nazirlikler arasında işbirlik yolları belgilendi. Mezkür meseleler Temsilcilikniñ daimiy nezareti altında bulunmaqta.