Çiçek ayınıñ 24-de, Qırım evi tarafından teşkil etilip, «Qırımnı işğalden azat etüv strategiyası: medeniyet» mevzusında onlayn munaqaşa olıp keçti. Ukraina Prezidentiniñ Qırım Muhtar Cumhuriyetindeki Temsilciligi Vaqtınca işğal etilgen Qırım Muhtar Cumhuriyeti ve Aqyar şeeri topraqlarını işğalden azat etüv ve ğayrıdan integratsiya etüv strategiyasını meydanğa ketirüvde doğrudan-doğru iştirak etti.

Munaqaşada Ukraina Prezidentiniñ Qırım Muhtar Cumhuriyetindeki Daimiy Temsilcisiniñ muavini Tamila Taşeva iştirak etti:

”Biz yalıñız Qırım toprağını degil, insanlarnı da qaytaramız. Bu eki mesele bir-birinen bağlıdır. Onıñ içün mevcut olğan alâqalarnı saqlap, ğayıp olğan soylarını ğayrıdan tiklemek kerekmiz. Vaqtınca işğal etilgen Qırım Muhtar Cumhuriyeti ve Aqyar şeeri topraqlarını işğalden azat etüv ve ğayrıdan integratsiya etüv strategiyası bu sene Prezident tarafından tasdıqlandı, bundan ğayrı, keçken seneden başlap, vaqtınca işğal etilgen topraqlardan kelgen abituriyentler Ukraina ükümetiniñ nezareti altında bulunğan topraqlardaki istegen aliy oquv yurtuna oqumağa kire bileler. Soñki bir buçuq yıl devamında musbet deñişmeler yüz berdi, misal olaraq, Qırım ile memuriy sıñırda nezaret etüv-keçüv noqtaları tamir etildi.

Ukraina tarafından vaqtınca idare etilmegen topraqlarda yaşağan sanatçılarnen medeniy bağlarımız, olarnıñ Ukrainanıñ medeniy ayatına qoşula bilmeleri ile müimdir. Vaqtınca işğal etilgen topraqlarda yaşağan bir çoq vatandaşımız medeniyetnen oğraşqan teşkilâtlarğa – medeniyet Nazirligine, Ukraina medeniy fonduna, Ukraina kitap institutına muracaat ete. Alim Aliyev tarafından başlatılğan ve Qırım evi tarafından devam etilgen ”Qırım inciri” leyhası aqqında aytmasam, olmaz. Devletimiz tarafından böyle teşebbüslerge qol tutuv pek müimdir”.

Ukrainada tamır halqlar meselesi, qırımtatar tiline qol tutuv, onı inkişaf ettirüv, bundan da ğayrı, içtimaiy saadaki çeşit türlü hızmetler, bank hızmetleri, onlayn şekilde berilgen hızmetler, medeniy-gumanitar saa, matbuat vastaları – bularnıñ episi alâqa meselesi ve vaqtınca işğal etilgen topraqlardan müsbet cevap almamız içün, muayyen ve tesir etici tedbirler almaq kerekmiz”, – dep qayd etti Tamila Taşeva.

Munaqaşağa bağlantı:https://fb.watch/56jjboQJCm/

#CrimeaIsUkraine #QırımUkrainadır #Qırım #StopRussianAggression