2018 senesi yanvar 23 künü Ukraina Prezidentiniñ Qırım MC Daimiy Temsilcisi Boris Babin Estoniya Cumhuriyetiniñ Tallinn şeerinde Havfsızlıq ve mudafaa halqara merkezi ve Estoniya Cumhuriyetindeki Ukraina elçihanesi tarafından keçirilgen ”Qırımnıñ işğalden azat etilüvi: ne vaqıt ve nasıl” serlevalı açıq seminarda iştirak etti. Merasmni Estoniya Tış işer naziri Sven Mikser açtı, seminarda Ukraina ve Estoniya mutehassısları ve memurları iştirak etti. Sven Mikser Qırımnıñ qanunsız işğalini qabul etmegen Avropa siyasetine ve Qırımda Rusiye tarafından insan aq-uquqlarınıñ ve halqara cemiyet tarafından tamır halq olaraq sayılğan qırımtatar halqınıñ aq-uquqlarınıñ bozuluvına ayrıca diqqat celp etti.
Daimiy Temsilci öz çıqışında Qırımnıñ işğalden azat etilüvi boyunca halqara gruppanıñ azası olğan ve Rusiye istilâsı şaraitlerinde daima Ukrainağa samimiy qol tutqan Estoniyağa Ukraina Prezidentiniñ teşekkürini bildirldi. Qırım sakinleriniñ qıta Ukrainada aq-uquqlarınıñ ve qanuniy menfaatlarınıñ qorçalavı maqsadınen Estoniyanıñ elektron idare etüv saasındaki ve işgalden azat etilüv şaraitlerinde Rusiye agent ve ortaqlarına qarşılıq kösterüv saasındaki tecribesinen paylaşuv imkânları muzakere etildi. Boris Babin Temsilcilikniñ vaqtınca işğal olunğan Qırımdan Rusiye tecavüzine qarşılıq kösterüv saasında faaliyeti, acele areketler planı ve bunınen bağlı strategik yönelişler aqqında malümat berdi.
Tallinnge seyaatı devamında Boris Babin Estoniya Tış işler nazirliginiñ siyasiy müdiri Paul Teesalu ve Estoniya Şurasınıñ mebusı, ”Estoniya-Ukraina” parlament gruppasınıñ başlığı Yogannes Kert ile iş körüşüvlerini keçirdi. Körüşüvler devamında Qırımdaki vaziyet, işğalci akimiyet tarafından basqınıñ artması, Avropanıñ ve bütün dünyanıñ havfsızlığına telüke yaratqan Qırım yarımadasınıñ silâlaştırıluvı, Rusiye qozğalağan davalar şaraitlerinde Ukraina ve Estoniya arasında işbirlik imkânları muzakere etildi. Qırımda ХІХ asırdan başlap yaşap kelgen eston milliy azğınlığına ait olğan Ukraina vatandaşlarınıñ medeniy, tasil ve til aqlarınıñ işğalci akimiyet tarafından bozuluvına ayrıca diqqat ayırıldı.