2018 senesi arman (avgust) ayı 7 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikteki halqara alâqalar ve uquqiy talil hızmetleriniñ hadimleri Qırımtatar resurs merkezi tarafından bir sıra devlet organları ile beraberlikte, Estoniya ükümetiniñ ve İnsan aqları boyunca Estoniya universitetiniñ qol tutuvı ile yerine ketirilecek ‘‘Zemaneviy tasil tehnologiyalar ve bilgi ve qatnaşuv vastaları yardımınen Ukrainanıñ memleket içinde köçken şahısları (qırımtatarlar) içün birdemlik ve imayecilik’’ leyhası azalarınıñ iş körşüvinde iştirak ettiler.

İş körüşüvinde Ukraina haber siyaseti Naziriniñ Birinci muavini Emine Ceppar, Qırımtatar Milliy Meclisiniñ azası Riza Şevkiyev, Qırımtatar resurs merkeziniñ reisi, Qırımtatar Milliy Meclisiniñ azası Eskender Bariyev, İnsan aqları boyunca Estoniya institutınıñ mesleatcışı Oliver Loode ve Ukraina Çetel işler Nazirliginiñ vekilleri iştirak ettiler.

Leyhanıñ maqsadı – Qırımtatar resurs merkezi tarafından cemaat teşkilâtlar tertibatınıñ quruluvı ve dünyanıñ medeniy devletlerinde #LiberateCrimea umumiy cemaat platformasınıñ meydanğa ketirilüvidir. Körüşüvniñ iştirakçileri bu platformanı teşkil etüv usulını, oña çeşit memleketlerden göñüllilerni celp etüv yollarını ve leyha tedbirlerinıñ iş cedvelini muzakere ettiler.

Borıs Babin, işbu platforma çerçivesinde Ukrainanıñ vaqtınca işğal etilgen Qırım toprağından istilânıñ devam etmesine qarşılıq kösterüv, Qırımda Ukraina devletiniñ, uquqiy şahıslarınıñ ve vatandaşlarınıñ aq-uquqlarını qorçalav boyunca 2018-2019 seneleri içün acele tedbirler Planınıñ bir sıra vazifeleri yerine ketirilecegini qayd etti. Daimiy Temsilci, Ukraina Prezidenti Petro Poroşenko tarafından teklif etilgen ‘‘Qırımnı işğalden azat etüvniñ dostları’’ teşebbüsine qol tutqan böyle leyhalarğa yüksek qıymet kesti.