2018 senesi yanvar 1 kününden başlap, yüksek migratsiya telükesi olğan memleketlerniñ, bu cümleden, RF-nıñ vatandaşları, Ukraina sıñırlarında mecburiy şekilde biometrik nezaretinden keçmeliler. Buña esaslanıp, işğalcilerge boysunğan içtimaiy ağlarda Qırımnıñ kiriş-çıqış noqtalarında Ukraina vatandaşları da  yalıñız tışqı biometrik pasport ya da ID-kart şekilindeki pasport esasında nezaretten keçe bilecekleri aqqında yañlış malümat darqatıla. Bu malümat yalan ve Rusiye işğali şaraitlerinde Ukraina devlet organlarınıñ itibarını tüşürmek maqsadınen mahsus uydurılğandır. Ukraina vatandaşları KÇNN-dan 1994 senesi berilip başlanğan Ukraina vatandaşı içki pasportı esasında keçmege devam ete bileler.

Ukraina devlet sıñır hızmetniniñ Azaq-Qaradeñiz idaresi bildirgenine köre, sıñırcılar Ukraina vatandaşlarında mevcüt olğan biometrik pasportlarnı yalıñız nezaret vaqıtını bir qaç daqiqadan bir qaç saniyegece qısqartmaq maqsadınen soray bileler. Bu esnasta pasport içine iç bir türlü işaret qoyulmay. Vatandaşta böyle pasport olmasa, KÇNN-da biometrik pasporttan malümat oquğan yañı doñatmalar olğan alda, 1994 senesi berilip başlanğan Ukraina vatandaşı içki pasportından malümatlarnı mütenasip sistemağa qolnen kirsetmege kerek ola. Amma böyle vaziyet vatandaşqa KÇNN-dan keçmege yasaq etmey, em de etmez. Temsilcilik vatandaşlarğa KÇNN-nıñ hadimleriniñ bütün qanunsız areketleri aqqında selâhiyetli uquq qorçalav organlarına ve doğrudan-doğru Temsilcilikke bildirmege ricada buluna.