2018 senesi çiçek ayı (aprel) 19 künü Ukraina Prezidentiniñ Qırım MC Temsilciliginiñ hadimleri Qırım evinde ‘‘Qırımnıñ Rusiye tarafından birinci ilhaqınıñ 235 yıllığı: sebepleri ve neticeleri’’ mevzusında munaqaşada iştirak ettiler. Tedbirde Qırımtatar Milliy Meclis reis muavini İlmi Umerov, tarihçi ve televizion alıp barıcısı Gulnara Bekirova, Ukraina milliy hatıra institutında milliy azğınlıqlar regional hususiyetleriniñ ve siyasetiniñ talili bölüginiñ müdiri Bogdan Korolenko, V.İ. Vernadskiy adına Tavriya Milliy Universitetiniñ rektorı Volodımır Kazarin, Qırım eviniñ program müdiri Alim Aliyev, cemaat faalcileri, jurnalistler iştirak etti.

Munaqaşa devamında Qırımnıñ Rusiye İmperiyası tarafından birinci ilhaqınıñ, 1783 senesi Qırım hanlığınıñ imperiyanıñ terkibine kirsetilüvi ve qırımtatarlarnıñ ana topraqlarından sürgün etilüvi kibi tarihiy negizi ve sebepleri muzakere etildi. Çıqışta bulunğanlar 1783 senesi Birinci ilhaq ve 2014 senesi Rusiye tarafından Ekinci ilhaq vaqiaları arasında parallel keçirip, Qırımnıñ qaytarıluvı içün farqlı nesillerniñ tecribesini işletüv imkânını talil ettiler.