2018 senesi ekim (oktâbr) ayı 12-14 künleri Temsilcilikniñ Kıyivdeki ofisiniñ hadimleri ‘‘Halqara advokatsiya ve #LIBERATECRIMEA qırımtatar halqı ile birdemlik ruhunı başlatuv’’ mevzusında Qırımtatar resurs merkezi ile Estoniya insan aqları institutı tarafindan teşkil etilgen iş körüşüvi-seminarda iştirak ettiler .
Tedbirde Qırımtatar resurs merkezi idaresiniñ başlığı, Qırımtatar Milliy Meclisiniñ azası Eskender Bariyev, Estoniya insan aqları institutınıñ müdiri Ayet Kukk, Estoniya insan aqları institutınıñ eksperti Oliver Loode, Ukraina çetel işler Nazirligi siyasiy bölüginiñ reberi Oleksiy Makeyev, rejissör, jurnalist Galina Cikayeva, ressam, karikaturcı Andriy Yarmolenko, İrlandiya Cumhuriyetinde ukrain cemiyetiniñ vekili Mıkola Krutsık iştirak ettiler.
Tedbirniñ birinci kününde ‘‘Devlet ve cemaat teşkilâtları arasında Qırım mevzusı boyunca işbirlik’’ serlevalı panel munaqaşası keçirildi, onıñ esnasında Temsilcilikteki halqara alâqalar hızmetiniñ reisi Yevgen Samuha Temsilcilikniñ cemaat teşkilâtları ve faalciler ile işbirliginde esas yönelişlerini aydınlattı, cemaat sektorına konkurs esasında cemaat ögünde sermiya ayıruv üzerinde nezaret boyunca Temsilcilikniñ teşebbüsi aqqında ikâye etti, Temsilcilikniñ tarihı, vazifeleri ve şimdiki faaliyeti, Ukrainanıñ vaqtınca işğal etilgen Qırım toprağından istilânıñ devam etmesine qarşılıq kösterüv, Qırımda Ukraina devletiniñ, uquqiy şahıslarınıñ ve vatandaşlarınıñ aq-uquqlarını qorçalav boyunca 2018-2019 seneleri içün acele tedbirler Planınıñ esas maddeleri ve olarnı yerine ketirüv aqqında iştirakçilerniñ ve ekspertlerniñ suallerine cevap berdi.
Tedbirniñ iştirakçileri #LIBERATECRIMEA halqara ruhınıñ maqsatları ve vazifeleri ile tanış oldılar, Qırımnıñ işğalden azat etilüvi oğrunda halqara ruhını inkişaf etüv boyunca areket planını ve strategiya esaslarını muzakere ettiler. Bundan da ğayrı, tedbirniñ iştirakçileri çıqışta bulunğanlarğa sualler berip, mevcut olğan problemalarnı ve olarnı çezüv yollarnı muzakere ettiler, halqara ruh çerçivesinde cemaat ögünde aktsiyalar ve çıqışlar içün ğayeler üstünde çalıştılar.
Körüşüv-treningniñ neticesi olaraq, taraflar #LIBERATECRIMEA halqara ruhını amelge keçirüv boyunca muayyen tedbirler aqqında añlaştılar.
#LIBERATECRIMEA – Qırımnı azat etüv ve Ukrainanıñ topraq bütünligine qol tutuv boyunca yañı halqara cemaat platforması, onıñ maqsadı Qırımnıñ qanunsız işğalini, halqara uquqnı qaba şekilde bozuvnı ve Qırımda 2014 senesi kiçik (feral) ayından başlap muntazam şekilde insan aqlarını bozuvnıñ esas sebebini toqtatmağa çağırğan cemiyet sesiniñ quvetleştirilüvidir.
