Bügün, temel qırımtatar halqınıñ sürgünligi başlanmasınıñ yıldönüminde, Ukraina Prezidenti Petro Poroşenko sovet rejiminiñ qırımtatar halqına ve bütün insanlıqqa qarşı bu vahşiy cinayetini iç bir vaqıt unutmaycağımıznı qayd etti. Ukraina Prezidenti zemaneviy cinayetçiler Qırım yarımadasınıñ işğali içün mesüliyetke çekilecegini, Ukrainalı Qırım kene de azat olacağını vade etti.

Ukraina Yuqarı Şurasınıñ başlığı Andriy Parubiy qayd etti ki, qırımtatarlar ecdatlarınıñ Qırım topraqlarında yalıñız Ukraina mustaqılligini ilân etken soñ serbest yaşamağa başladılar, amma bügün rusiye işğalcileri Qırımda qırımtatarlarğa ve ukrainalılarğa qarşı zorbalıq ve cezalavlarnı başladı, Ukrainalı Qırım soñki dört yıl devamında zemaneviy rusiye işğali şaraitlerinde boğulmaqta.

Ukraina ukümetiniñ başlığı Volodımır Groysman sürgünlik qırımtatarlar içün pek facialı olğanını hatırlattı, çünkü onıñ tek birinci yılı devamında açlıqtan, hastalıqlardan ve zayıflıqtan 30 biñden ziyade insan elâk oldı.

Ukraina Milliy Havfsızlıq ve Mudafaa Şurasınıñ Kâtibi Oleksandr Turçinov qayd etkenine köre, işğal etilgen Qırımda Rusiye bügün aynı maqsat ile qırımtatarlarnı, olarnıñ azatlıqqa ıntıluvlarını sındırmağa tırışa, amma, buña baqmadan, qırımtatar halqı kreml zalımlarnıñ bütün areketlerine baqmadan, öz toprağında yaşamağa devam etecek.

2018 senesi qural ay (mayıs) 18 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikniñ diger hadimleri genotsid qurbanlarını añma künü munasebeti ile Herson şeerinde keçirilgen tedbirlerde iştirak ettiler. Daimiy Temsilciniñ Birinci muavini İzet Gdanov ve Temsilcilikniñ başqa hadimleri Kıyivdeki bügünki matem tedbirlerinde iştirak etti, Temsilcilikte Qırım MC işğalden azat etilüvi ve ğayrıdan integratsiyası boyunca hızmetniñ reisi vazifesini vaqtınca becergen şahıs işe Geniçesk rayonınıñ Novooleksiyivka qasabasında bulundı.