2018 senesi çiçek ayı (aprel) 27 künü Kıyiv şeerinde ‘‘Qırımtatar halqı sürgünliginiñ taqiqatı: problemaları ve istiqbali’’ mevzusında tögerek masa keçirildi. Tögerek masanı Qırımtatar resurs merkezi teşkil etti. Temsilcilikte uquqiy talil hızmetiniñ baş mesleatçısı Ruslan Seydametov munaqaşada iştirak etip, mütenasip siyasiy-uquqiy ceryanlar boyunca Temsilcilikniñ nazar noqtasını bildirdi. Qırımtatar halqınıñ sürgünligi boyunca cinaiy işniñ açıluvı tarihiy adaletniñ tiklenmesi, qabaatlılarnıñ cezalanması, sürgün etilgen şahıslarnıñ aq-uquqlarınıñ qorçalanması, Ukraina tarafından genotsidniñ cezalavı boyunca halqara mesüliyetiniñ yerine ketirilmesi oğrunda muim adımdır. Bu taqiqatnıñ mahkeme qararı olmadan bitirilüvi menfiy siyasiy ve uquqiy neticelerge ketirir. Sürgünlik insaniyetke qarşı ve müddeti olmağan bir cinayet, o aselet ne de 1944 senesi, ne de 1956 senesi, ne de 1967 senesi bitirilmedi.
Bu cümleden, qırımtatar halqınıñ medeniy, til, etnik özgünligini yoq etüv siyasetiniñ ayırılmaz qısımı ve doğrudan-doğru devamı – qırımtatarlarnıñ XX asırnıñ 60-80 senelerinde tekrarlanğan sürgünlikleri, em de bu cinayetlerniñ ortaqları ale daa yaşamaqtalar. İstilâci devlet sürgünlikni taqiq etmege istemegenine ve Ukraina Havfsızlıq Hızmetiniñ Qırım MC Baş idaresi 2009-2011 seneleri alıp barğan protssesual areketleri boyunca vesiqalarnı yoq etkenine lâyıq uquqiy qıymet kesilmeli.
Temsilcilik sürgünlik taqiqatı neticesinde sürgün etilgenler statusını alğan şahıslarnıñ aq-uquqlarınıñ tiklenmesi içün ertaraflama uquqiy yardımnı bermege azır. 17.04.2014 qabul etilgen 1223-VII sanlı ‘‘Millet mensüpligine köre sürgün etilgen şahıslarnıñ aq-uquqlarnıñ tiklenilmesi aqqında” qanunnıñ ilk nevbette qıta Ukrainada yerine ketirilüvi, sürgün etilgen şahıslarğa mütenasp şeadetnamelerniñ berilüvi ve olarnıñ aq-uquqlarınıñ amelde yerine ketirilüvi içün semereli mehanizmler üstünde çalışuvğa Temsilcilik mahsus diqqat ayıracaqtır.
Munaqaşada Qırımtatar resurs merkeziniñ idare başlığı Eskender Bariyev, Ukraina haber siyaseti Naziriniñ birinci muavini Emine Ceppar, Ukraina halq deputatı Mıkola Knâjitskiy, siyasiy ilimler namzeti, tarihçi Gulnara Bekirova, savcılıqta uyken taqiqatçı Trohim Lugıvıy ve başqaları iştirak etti.