Ukraina Prezidentiniñ Qırım Muhtar Cumhuriyetindeki Temsilciligi vaqtınca işğal etilgen Qırım Muhtar Cumhuriyeti ve Aqyar şeeri topraqlarında qırımtatar halqını temsil etken organlarnı taqip etken Rusiye Federatsiyası işğalci memuriyetiniñ yañı areketlerini takbih ete.
Sözde ”Qırım yuqarı mahkemesi” tarafından Qırımtatar Milliy Meclisi reisi Refat Çubarovnı 2014 senesi kiçik aynıñ 26-da Qırım Muhtar Cumhuriyeti Yuqarı Şurasınıñ binası yanındaki ”kütleviy nizamsızlıqnı” teşkil etüvde qabaatlavğa esaslanıp, onı 6 yılğace azatlıqtan marum etecek qarar tamır qırımtatar halqını ve onı temsil etken organlarnı Qırımdan quvmaqnı, işğalci akimiyetke boysunmağan insanlarnıñ areketlerini boğmaqnı ve vaqtınca işğal etilgen Qırımda rus milletine mensübiyetten ğayrı bir-de-bir başqa milliy mensübiyetni silmekni maqsat etip qoyğan siyasetniñ devam etmesinden başqa bir şey degildir.
Vaqtınca işğal etilgen Qırımdaki siyasiy kerçeklerden farqlı olaraq, yarımadanıñ işğal etilmesi sebebinden vaqtınca işğal etilgen Qırımnı terk etmege mecbur olğan vatandaşlarımıznıñ aq-uquqlarına riayet etilmesi ve tamır qırımtatar halqını aq-uquqlarını yerine ketirilmesi içün Ukraina mütenasip şaraitler yarata.
Böyleliknen Ukraina Yuqarı Şurası 2014 senesi saban ayınıñ 20-de ”Ukraina devletiniñ terkibinde qırımtatar halqınıñ aq-uquqlarına riayet etilmesini kefil etken Ukraina Yuqarı Şurasınıñ beyanatı aqqında” Qararnamesi ile Qırımtatar Milliy Meclisini, Qırımtatar halqı Qurultayınıñ icra organıni ve qırımtatar halqını temsil etken aliy temsilci organ sıfatında Qurultaynı tanıdı.
2014 senesi kiçik aynıñ 26-da Aqmescit şeerinde Ukrainanıñ topraq bütünligine qol tutmaq maqsadınen keçirilgen mitingniñ yıldönümi munasebetinen ve ayrıca vaqtınca işğal etilgen Qırım MC ve Aqyar şeerinde yaşağan Ukraina vatandaşlarınıñ cesürligine ve qaramanlığına sayğı ve ürmetimizni köstermek maqsadınen 2020 senesi kiçik (fevral) aynıñ 26-da Ukraina Prezidenti tarafından imzalanğan 58/2020 sanlı Fermanğa binaen kiçik (fevral) aynıñ 26 Qırım Muhtar Cumhuriyetiniñ ve Aqyar şeeriniñ işğal etilüvine qarşılıq kösterüv Künü olaraq qayd etilmege başladı.
Qırımtatar halqına maksimal derecede qol tutmaq içün Ukraina izçen adımlar yapmaqta. Ağımdaki sene mayısnıñ 18-de Ukraina Prezidenti şu cümleden tamır qırımtatar halqınıñ esas aq-uquqlarını kefil etken ve acele sürette baqılacaq 5506 sanlı ”Ukrainanıñ tamır halqları aqqında” qanun leyhasını Ukraina Yuqarı Şurasına taqdim etti.
Hatırlatamız ki, 2017 senesi ”Ukrainanıñ Rusiye Federatsiyasına qarşı davası” boyunca BM Halqara Mahkemesi tarafından çıqarılğan qararğa binaen qırımtatarlarnıñ öz menfaatlarını temsil etmek aqlarını sıñırlamaqtan vazgeçmek ve şu cümleden Meclis faaliyetiniñ ğayrıdan tiklenmesine yol bermek kibi vaqtınca tedbirlerni Rusiye Federatsiyası bu vaqıtqace yerine ketirmedi.
Rusiye Federatsiyasını vaqtınca işğal etilgen Qırımda Ukraina vatandaşlarını milliy ve diniy alâmetleri, fikir ve baqışları, mevamları ve olarnı beyan etkenleri üçün taqip etüvden vazgeçmege bir kere daa çağıramız.