Bugün Ukraina çetel işler Nazirliginde qırımtatar milliy bayrağı tantanalı sürette köterildi, tedbirde Ukraina Prezidentiniñ Qırım Muhtar Cumhuriyetindeki Daimiy Temsilcisiniñ muavini Tamila Taşeva, Ukraina çetel işler Naziriniñ birinci muavini Emine Caparova, qırımtatar halqınıñ lideri Mustafa Cemilev ve Qırımtatar Milliy Meclisiniñ reisi Refat Çubarov iştirak ettiler.

”Bugün aynı vaqıtta eki bayramımız bar – Qırımtatar milliy bayraq künü qayd etilmekte ve tamam 30 yıl evelsi milliy ruhumıznı ve birdemligimizni ilhamlandırğan Qırımtatar halqı Qurultayı ğayrıdan tiklengen edi!

Tarihiy adaletni ğayrıdan tiklev oğrundaki küreşimiz ve metanetimiz bütün dünyadaki millionlarnen insanlarnı ilhamlandıra!” – dep qayd etti öz çıqışında Ukraina çetel işler Naziriniñ birinci muavini Emine Caparova.

Tamila Taşevanıñ öz nevbette qayd etkenine köre, qırımtatarlarnıñ Vatanları vaqtınca Rusiye Federatsiyası tarafından işğal etilgen arada qırımtatar milliy bayrağı işğalci akimiyet tarafından kerçekleştirilgen başqı, cezalav, taqip etüv ve maküm etüv kibi areketlerge qırımtatar halqınıñ qarşılıq kösterüvni temsil ete.