Mütenasip areketler em söz serbestligini, em de Qırımtatar Milliy Meclisini taqip etüv siyaseti devam etkenini isbatlay.

Keçenlerde sözde Aqmescitteki Kıyiv rayonınıñ Mirovoy mahkemesinde” ”Qırım” gazetiniñ baş muarriri Bekir Mamutovğa qarşı ”memuriy qanunnı bozuv aqqında dava” baqılmağa başladı.
Oturışuv diñleyicisiz keçti, çünki olarnı sözde ”mahkemege” kirsetmediler.

Bekir Mamutovğa qarşı sözde ”Roskomnadzor hadimleri” Qırımtatar Milliy Meclisni añğan BM Baş Kâtibi maruzasını derc etkeni içün Rusiye Memuriy bozuvlar kodeksiniñ 13.15 maddesi boyunca protokol tizdiler. Sözde ”Alâqa, informatsion tehnologiyalar ve kütleviy haberleşüv üzerinde nezaret boyunca Federal hızmetniñ Qırım Cumhuriyeti ve Aqyar şeeri boyunca İdaresi” bu maqaleni Rusiye qanuniyetini bozuv olaraq qabul ete, çünki Rusiye Federatsiyası Meclisni faaliyeti yasaq etilgen ekstremistik teşkilât olaraq tanıdı ve kütleviy matbuat vastalarında Meclisni añğan maqaleler mıtlaqa onıñ Rusiye Federatsiyasında yasaq etilgenini işaretlemelidir. ”Qırım” gazetinde derc etilgen BM Baş kâtibiniñ maruzasında böyle işaretleme olmağanından sebep baş muarrirge qarşı ”memuriy protokol” tizildi.

Sözde ”mahkemede” muarririyetniñ mevamı taqdim etildi, bundan soñ ”memuriy protokolnı” tizgen Roskomnadzornıñ vekilleri kelmegenleri sebebinden oturışuvda teneffüs ilân etildi. Nevbetteki oturışuv çiçek ayınıñ 20-ne planlaştırıldı.
Temsilcilik vaqtınca işğal etilgen Qırımda söz serbestligini ve Qırımtatar Milliy Meclisini taqip etüvni toqtatmağa, 2017 senesi ”Ukraina RF-ke qarşı” dava boyunca vaqtınca tedbirlerniñ alınmasını, şu cümleden qırımtatarlarnıñ menfaatlarını temsil etken teşkilâtlarnıñ sıñırlanmasını yasaqlağan ve Meclis faaliyetiniñ ğayrından tiklenmesini qarar etken Halqara mahkemeniñ qararnı yerine ketirmege ve ”Qırım” gazetiniñ baş muarriri Bekir Mamutovnı taqip etüvni toqtatmağa çağıra.

Fotoresim: Qırım.Aqiqat