2018 senesi boş ay (noyabr) 12 künü Ukraina Prezidentiniñ Qırım MC Daimiy Temsilcisi Borıs Babin, onıñ Birinci muavini İzet Gdanov ve Temsilcilikteki hızmetlerniñ baş mesleatçıları Bahşış Kerimov ile Ruslan Seydametov Kıyiv şeerinde keçirilgen Qırımtatar Milliy Qurultayınıñ delegatları konferentsiyasında iştirak ettiler.

Konferentsiyada baqılğan esas meseleler arasında delegatlar ilhaq etilgen Qırım toprağındaki vaziyetni, Qurultay delegatları vazifelerini devam etüvni ve 2014 senesi saban (mart) ayı 29 künü nevbetten tış Qurultay toplaşuvınıñ qararlarını yerine ketirüvni muzakere ettiler.

Konferentsiyada Qırımtatar Milliy Meclisiniñ reisi Refat Çubarov Ukraina Prezidenti Petro Poroşenko adından qırımtatar halqına muracaatnı oqudı. Muracaatta Ukraina Prezidenti Ukraina Esas qanunına yapılacaq deñişüvler boyunca iş gruppası öz faaliyetini yekünlegenini, yaqın vaqıtta tekifler Esas qanun komissiyası tarafından baqılacağını qayd ete. ‘‘Esas qanun komissiyası eñ yaqın vaqıtta deñişüvler leyhasını közden keçirip, onı Parlamentke taqdim etmek içün maña berecekler. Munaqaşa qolay olmaycağını epimiz añlaymız, amma Ukraina qırımtatar halqı boyunca Esas qanunğa kirsetilecek deñişüvlerge muhtaç’’, – dep qayd etti öz muracaatında Petro Poroşenko.

Devletimizniñ başlığı qırımtatar halqınıñ mustaqil Ukraina devleti terkibinde özüni belgilev aqqını ve yekâne Ukraina terkibinde qırımtatar milliy-territorial muhtariyetiniñ mahsus statusını pekitmege kerek olğanını da qayd etti.

Petro Poroşenko öz muracaatında BMT Baş Assambleyası Üçünci Komitetiniñ toplaşuvında eñ yaqın vaqıtta Qırımda yañı insan aqları bozuluv adiseleri boyunca yañı rezölütsiya leyhası baqılacağını bildirldi.