Ukraina Prezidentiniñ Qırım MC Daimiy Temsilcisi Boris Babin ve onıñ Birinci muavini İzet Gdanov, hızmetlerniñ başlıqları ve Temsilcilikniñ baş danışmanları iştiragi ile Qızıl Haç Halqara Komitetiniñ ofis başlığı Maksim Zabaluyev ve Ukrainada Qızıl Haç Halqara Komiteti taqımınıñ iqtisadiy meseleleri boyunca mesleatçısı Rocer Şelton ile iş körüşüvini keçirdiler.

Körüşüv devamında Boris Babin acele sürette çezilmesini talap etken, bu cümleden, vaqtınca işğal olunğan Qırımda daimiy şekilde yaşap, azatlıqtan marum etilgen Ukraina vatandaşlarınıñ pasport vesiqalarını resmiyleştirüv, olarnıñ gumanitar ihtiyaсlarına cevap berüv kibi bir sıra gumanitar meselelerni qayd etti.
Mütenasip meseleler vaqtınсa işğal olunğan topraqlarda vesiqa almaqnıñ pek qıyın ya da imkânsız olğanınen, maküm etilgenlerniñ soy-sopları ile mektüpleşmege çareleri olmağanınen, bazılarında memuriy alımlarnı tölemek içün paraları olmağanınen bağlıdır.

Herson vilâyeti seviyesinde Temsilcilik tarafından alınğan tedbirler beyan etilip, Ukrainağa boysunğan bütün topraqlarda Temsilcilikniñ mütenasip faaliyetini kerçekleştirmek içün işbirlik mehanizmi taqdim etildi.
QHHK temsilcilerini gumanitar saadaki vaziyet ile tanıştırdılar. Misal olaraq, ayıruv yolağı işgalci akimiyetniñ nezareti altında bulunğanı içün, Ukraina vatandaşlıqlarını tasdıqlağan qanuniy vesiqaları olmağan şahıslar Qırımdan qıta Ukrainağa baralmaylar.

İzet Gdanov musafirleriniñ diqqatını vaqtınca işğal olunğan topraqlarda siyasiy mabüslerge yaramay muamele kösterilgenine, olarğa kerekli tıbbiy yardım berilmegenine çekti. Siyasiy mabüslerniñ gumanitar meseleleriniñ çezilüvinen ve olarnıñ qorantalarına memuriy yardım berüvinen bağlı olğan Temsilcilikniñ şimdiki faaliyeti aqqında haber etildi.

Körüşüvniñ iştirakçileri QHHK-nıñ vaqtınca işğal etilgen Qırımdaki faaliyetini muzakere ettiler. QHHK-nıñ temsilcileri RF-nıñ işğalci akimiyeti olarğa vekâletli halqara teşkilâtı sıfatında işğalcilerniñ nezareti altında bulunğan apis yerlerini ziyaret etmekte kesen-kes red etkenini haber ettiler.
Qızıl Haç Halqara Komitetiniñ temsilcileri Qırımda ve qıta Ukrainada teşkilâtınıñ nizamnamesi boyunca vazifelerini yerine ketirip davanıñ qurbanlarına yardım bermek içün qollarından kelgenini yapmağa azır olğanlarını qayd ettiler.

Bundan da ğayrı, işbu körüşüvden evel QHHK ve Temsilcilikniñ vekilleri tarafından kerçekleştirilgen ‘‘Qalançaq’’ ve ‘‘Çaplınka’’ KÇNN-nı ziyaretleriniñ neticesi olaraq, körüşüv devamında ‘‘Qalançaq’’ kiriş-çıqış nezaret noqtasınıñ donatıluvına tehnikiy yardım ayırmağa kerek olğanı belgilendi.

İşbu tedbirler memuriy sıñırından keçken vatandaşlar içün havfsız şaraitler yaratmaq maqsadınen yapılmalı, yani piyadeler içün yollar abanlaştırılmalı, asmalar qurulmalı, yarıq keçirilmeli, ana ve bala içün oda teşkil etilmeli ve acele tıbbiy yardım berilmelidir.

Keñeş devamında memleket içinde mecburen köçken şahıslardan çoqbalalalı qorantalar, saqat, işsiz ve eşli-başlı olğanlarnıñ gumanitar ihtiyaclarına cevap bermek, bu cümleden, ev-meskennen temin etmek kibi meseleler de muzakere etildi. Misal olaraq, olarnı Herson şeeriniñ yataqhanelerinde yerleştirmekniñ imkânı baqıldı, köçip kelgenlerniñ başqa meseleleri baqıldı. QHHK-niñ temsilcileri davanıñ qurbanlarına Ukraina Qızıl Haç teşkilâtınen beraberlikte yapa bilecekleri muayen yardım imkânları aqqında haber ettiler. Körüşüvniñ neticesinde taraflar umumiy meselelerni çezüvinde kelecekte işbirlik aqqında añlaştılar.