Ukraina Baş savcılığınıñ Baş arbiy savcılığı Ukrainağa qarşı tecavuziy cenkniñ başlanması ve devam etmesi, em de Qırımnıñ işğaline ve başqa ağır neticelerge ketirgen başqa cinayetlerni kerçekleştirilmesi munasebeti ile RF Silâlı quvetleriniñ temsilcilerine qarşı makemeden evel semereli taqiqatnı alıp barmaqta. Toplanğan isbatlarnıñ esasında 2018 senesi saban ayınıñ (mart) 1 künü istilâcı devletniñ Anayasal makemesiniñ başlığına ve 18 makemecisine Ukraina cinaiy kodeksiniñ 5 qısımnıñ 27 maddesi ve 3 qısımınıñ 110 maddesi boyunca cinayetlerniñ yapıluvında şeklengenleri aqqında bildirüv azırlandı.

2014 senesi saban ayınıñ (mart) 18 künü Moskova şeerinde RF Prezidenti ve onıñ qafadarları, istilâcı devletniñ reberiyeti tarafından ‘‘Qırım Cumhuriyetiniñ ve Aqyar şeeriniñ akimiyeti’’ olaraq qanunsız şekilde adlandırılğan fizikiy şahıslar, ‘‘RF-na Qırım Cumhuriyetiniñ qoşulması ve RF terkibinde yañı subyeklerniñ teşkil etilüvi’’ sözde añlaşmanı imzaladılar. Bu ‘‘Añlaşma’’ halqara-uquqiy ceetten iç bir türlü mana taşımağanına, Ukraina ve RF anayasalarına zıt kelgenıne, onıñ metininde mantıqsız ifadeler, iddialar ve kelecek künnen bağlı zanlar bulunğanına baqmadan, RF Anayasal makemesiniñ makemecileri Ukrainanıñ territorial bütünligine ve mustaqilligine qarşı cinayet yapmağa niyetlengen akimiyet vekilleri ve RF Silâlı küçleri ile evelki añlaşmalarına köre areket etip, em RF Anayasal makemesiniñ qaidelerini, em rusiye qanuniyetiniñ talaplarını, em de RF halqara mecburiyetini qaba şekilde bozdılar.

RF Anayasal makemesiniñ mütenasip qanunsız qararlar Ukrainanıñ territorial bütünligine qast etüvden ğayrı, RF AM başlığı ve azaları tarafından yapılıp, RF reberiyetine işğalni qanunlaşırmağa ve devletimizniñ bir qısımınıñ ihlâq etilmesine ıntıluvlarğa ketirgen idariy cinayetniñ açıq-aydın alâmetlerini taşımaqta. RF AM makemecileriniñ Ukrainada rusiye istilâsınen bağlı areketlerine yekünleyici qıymetini em ukrain makemesi, em de BMT Halqara cinaiy makemesi kesecek.