Ukrainanıñ topraq bütünligi aqqında qararnameniñ 7-nci yıldönümi munasebetinen 2021 senesi saban ayınıñ 27-de BM Baş Assambleyasınıñ 47 aza memleketi umumiy beyanat yaptı. Mevamları açıq-açıq-aydın: ”Rusiye, barışıqlıqnı tiklemege yardım etecek aracı degil de, Ukraina şarqındaki davanıñ iştirakçisidir”.
Hatırlatamız ki, yedi yıl evelsi, 2014 senesi saban ayınıñ 27-de, BM Baş Assambleyası açıq rey berüv vastasınen ”Ukrainanıñ topraq bütünligi” 68/262 sanlı qararname qabul etti, işbu qararnamege BM aza memleketlerniñ ekseriyeti, yani 100 devlet qol tuttı. Halqara cemiyet Ukrainanıñ egemenligine, siyasiy mustaqilligine, umumiyligine ve topraq bütünligine qol tuttı, Rusiye Federatsiyasınıñ Qırımdaki areketlerini takbih etti.
BM Baş Assambleyasınıñ açıq-aydın talaplarına baqmadan, Rusiye Federatsiyası vaqınca Qırım işğalini toqtatmadı. Aksine, Qırımda insan aqları saasında bozuluvlar ve cinayetler, arbiy küçlerini arttıruv ve arbiyleştirüv devam ete.
Keçenlerde halqara gumanitar uquqnı ve insan aqlarını bir kere daa bozğan Rusiye Federatsiyası Ukraina vatandaşlarını Qırımda topraq mülkiyeti aqqından marum etti. Böyle areketlerge zorbalıqnen Rusiye vatandaşlığını qabul ettirüv olaraq qıymet kesmek mümkün.
Rusiyeniñ areketleri BM Nizamnamesi, Helsinki yekünleyici aktı, halqara gumanitar uquq ve insan aqları saasında uquq kibi halqara añlaşmalarğa zıt kele.
”Minsk añlaşmalarına binaen alğan mecburiyetlerini bozğan ve Ukrainadaki vaziyetni istiqrarsızlaştırmağa devam etken Rusiyetniñ hususan Donetsk ve Lugansk vilâyetleriniñ ayrı rayonlarındaki areketlerini qattı sürette takbih etemiz. Normand formatındaki ğayretlerge qol tutqanımıznı ve Ukrainanıñ egemenligine ve topraq bütünligine ürmetimizni bildirip, Ukraina şarqındaki davanıñ Minsk añlaşmalarına binaen barışıqlıq yolunen çezilüvine sadıq qalğanımıznı tasdıqlaymız. Rusiye, aracı degil de, Ukraina şarqındaki davanıñ iştirakçisidir.
Qırım Muhtar Cumhuriyetini ve Aqyar şeerini işğalinden deral azat etmege ve Qırımdaki vaziyetke dair BM Baş Assambleyasınıñ mütenasip qararnamelerini tolusınen yerine ketirmege Rusiye Federatsiyasını bir kere daa çağıramız. Qırımdaki vaziyetke dair dünya cemiyetiniñ ğayretlerini birleştirmek maqsadınen Halqara Qırım platformasını teşkil etmege niyetlengen Ukrainanıñ teşebbüsini alğışlaymız”, – dep bildirile beyanatta.
Beyanatnıñ tam metini ile Ukraina çetel işler nazirliginiñ saifesinde tanış olmaq mümkün: