Bugün, 2021 senesi qural aynıñ 21-de, sözde ”Qırım Cumhuriyeti Yuqarı mahkemesi” Ukraina vatandaşı İvan Yatskinni sözde ”Rusiye devlet sırı olğan malümatnı toplav ile Ukrainağa tesil etüvde” qabaatlap, uydurılğan kriminal dava boyunca 11 yıl qattı tertipli koloniyada qalmasına ve azatlığınıñ bir yılğa sıñırlanmasına üküm etti.

Qırım Muhtar Cumhuriyetindeki Aqmescit rayonınıñ Molodöjnoye köyünde yaşağan İvan Yatskin FSB hadimleri tarafından taa 2019 senesi ekim ayınıñ 16-da yaqalanğan edi, amma yaqalanğanı aqqında dört ay keçken soñ belli oldı.

Yaqalanğan künü sözde ”Aqmescitniñ Kıyiv rayon mahkemesi” Yatskinni apis etti, bundan soñ o, qanunsız şekilde RF topraqlarına avuştırıldı ve ”Lefortovo” adındaki Moskova tevqifhanesinde tutuldı.

O, (RF Ceza kodeksiniñ 275-nci maddesi boyunca) devlet hainliginde qabaatlandı.

Ukraina Prezidentiniñ Qırım Muhtar Cumhuriyetindeki Temsilciligi Rusiye Federatsiyasınıñ işğalci memuriyetlerine bosunmağan Ukraina vatandaşlarını taqip etken işğalci organlarınıñ areketlerini takbih ete, siyasiy sebeplerden taqip etüv qurbanlarına yardım etmek, qabaatlı şahıslarnı mesüliyetke çekmek ve Rusiye Federatsiyasına siyasiy-diplomatik basqını arttırmaq maqsadınen taqip etüv adiselerini qayd ete ve elde etilgen malümatnı Ukraina uquq qorçalav organlarına ve halqara teşkilâtlarğa teslim ete.

İvan Yatskin davası boyunca tafsilâtlı malümat ”Gratı” matbuat vastasınıñ maqalesindedir:https://graty.me/?s=Яцкин