Açiq malümat menbalarından Ukraina Prezidentiniñ Qırım MC-deki Temsilciligine 2021 senesi qara qış ayınıñ 26-da Rusiye Federatsiyasınıñ işğalci akimiyeti tarafından vaqtınca işğal etilgen Qırım Muhtar Cumhuriyeti ve Aqyar şeeri topraqlarında qanunsız şekilde keçirilgen mezat neticesinde ”Koktebel” şirketiniñ mal-mülkü qanunsız şekilde satılğanı aqqında belli oldı. Mezatnıñ ğalibi olaraq ”Zavod maroçnıh vin Koktebel” mesüliyeti sıñırlı olğan cemiyet ilân etildi.
Qırım Muhtar Cumhuriyeti ve Aqyar şeeri Rusiye Federatsiyası tarafından işğal etilgeni sebebinden nezaret etilmeyip qalğan iqtisadiy mal-mülkni qorçalamaq kerekligini köz ögüne alıp, Temislcilik taqımı tarafından toplanğan mütenasip malümatlar Qırım Muhtar Cumhuriyeti ve Aqyar şeeri Prokuraturasına teslim etildi.
Ukraina Prezidentiniñ Qırım MC-deki Temsilciligi Qırım Muhtar Cumhuriyeti ve Aqyar şeeri Prokuraturasına vekâletleri çerçivesinde yuqarıda qayd etilgen malümatlarğa qıymet kesmekni ya da olarnı al-azırda açılğan cinaiy davalarğa qoşmaqnı rica ete.
”Koktebel” şirketi Qırım yarımadası topraqlarında istisal etken eñ eski şirketlerden biridir. Barakol ve Armutluq vadiylerinde ösüp, şirketke ait olğan yüzümliklerniñ meydanlığı 1100 gektarnı teşkil ete. Şirket çoq yıllar devamında madera şarabını istisal etmekte, 200 biñ dekalitr miqdarında madera sığdıra bilecek meydançığı ise Avropanıñ eñ büyük meydançıqlarından biridir. ”Koktebel” şarapları tek aynı adnı taşığan köyde degil de, Ukrainanıñ sıñırlarını aşıp, devletimizni halqara yarışlarda temsil etip tanılğan isimdir.
Hatırlatamız ki, Qırım Muhtar Cumhuriyeti ve Aqyar şeeri vaqtınca işğal etilgen soñ, ”KD Koktebel” mesüliyeti sıñırlı olğan cemiyet işğalci RF talaplarına binaen resmiyleştirildi. Kira añlaşması toqtatılsa kerek, çünki 2014 senesinden berli ”Radgosp-zavod «Koktebel» devlet şirketiniñ mal-mülkü qanunsız şekilde 2064 senesi çiçek ayınıñ 21-nece ”Zavod maroçnıh vin Koktebel” mesüliyeti sıñırlı olğan cemiyetke kirağa berildi.